Rebentador
Desyembre 21, 2008

BISAN sa kadaghan sa mga panghitabo nga mugna sa rebentador, makalibog jud nga huna hunaon ngano nga padayon man ang atong paggamit niini.

Niining umaabot nga pagsaulog nato sa Pasko daw ato nang matagna ang sangputanan.

Magbalik-balik ang senaryo. Sama sa nangaging katuigan atong nasud-ong ang makaluluoyng kahimtang sa mga angol didto sa mga tambalanan.

Aw, sumala ba nakakita man kamo sa mga biktima nga milagpot ang mga mga tudlo sa kamot, kalawasan napaso, mata misulpot, kamot napungkol, nawong dili na mahitsura kay naigo sa pabuto.

Dili tiaw ang kakusog sa pwersa niining bag-ong matang sa mga rebentador. Hadlok pamation ang kalanog sa pinaka-paka sa modernong klase sa eksplosibo.

Diri sa among lungsod, bisan tuod semana pa una ang Pasko alingisig nang pamation ang butobuto sa palibot.

Dunay gabii nga maayo untang ihinanok apan kalit kaming mahipugwat kay dunay sipa nga buto sa among nataran.

Sus, pagkasakit pamation sa atong dawunggan ang lanog gikan sa Judas belt, bawang ug triangle.

Naa pay superlolo ug whistle bomb nga managhoy una sa dili pa moulbo. Basta, hasul lagi nga patalinghugan.

Ang taga syudad tingali dili sab mahiluna panahon sa kagabhion. Subra ka alingugngog ang ilang kalikupan.

Diha ra bay panahon kaniadto nga samtang nagdibal ang butobuto sa nagkadaiyang matang sa rebentador, ang mga adik namusil usab sa mga tawo.

Dunay naksabsan ug kinabuhi sa maong sitwasyon. Sa pagkatawo sa Mesiyas didto sa Betlehem mokapin sa dos mil ka katuigan ang milabay, mingaw ang dapit.

Balaanon ug solemne ang kahigayonan. Gihulagway kini sa awit Silent Night, Holy Night.

Karon, sultihi ko kon unsay relasyon sa Pasko ug sa rebentador! Trabaho sa DENR pagpanalipod sa kalikopan aron masiguro nga luwas kini sa polusyon.

Karon panahon sa Pasko ug Bag-ong Tuig uso kaayo ang mga fireworks. Hinumdomi nga kining maong matang sa pagpabuto ang aso niini makadugang sa polusyon ug ingon man sa global warming.

Hagit ngadto sa DENR nga mopakanaug sila og kamandoan nga magdili sa mga fireworks ilabina atol sa Pasko ug Bag-ong Tuig.

Gawas nga makatabang kini sa pagpanalipod diha sa kahanginan, makalikay usab kini sa disgrasya niadtong mga tawo nga mabuthan.

Angayan magpirma og kasabutan ang DENR, DOH ug ingon man tanang lokal nga kagamhanan alang niining maong tumong.

Kining tagsulat manghinaut sa usa ka Malipayong Pasko ug Bulahang Bag-ong Tuig 2009!

Way rebentador ha!

MIRISI !!!
Desyembre 14, 2008

KANIADTONG nagsingabot pa ang Dream Match ni Manny Pacquiao batok Oscar de la Hoya kita nakasinati sa gibuhiang mga analisis, pagtutimbang ug komentaryo gikan sa media.

Sagad ra ba jud sa atong nasagap nga way porsento sa pagdaug ang atong idolo. Hinoon, ngilngig man jud ug record ang Amerikano Mehikanong boksidor.

Gawas pa nakabaton siyang bentaha sa gitas-on balig upat ka pulgada. Ang kawhat sa kamot laing pabor ni Oscar.

Diri sa among lungsod daghan ang nanghagit og pustaanay. Kang Oscar de la Hoya sila.

Gani aduna pay logro. Kausa niana misuway kog patin aw sa nanagpundok nga mga sugarol, mga sigurista.

Ako silang giingnan nga si Manny aduna usab ing bintaha. Una, siya maoy hari sa pound for pound sa tibouk kalibutan.

Gawas sa bug at nga kumo magpusot-pusot pa sa kadaghan. Ikaduhang bentaha mao nga bisan ug mibug at ang iyang timbang nagpabilin ang kapaspas sa iyang lihok.

Butang nga maglisod si de la Hoya pag-agpas. Way mituo nako. Ako ra batok usa ka gatos.

Bisan diay didto sa Amerika daghang Pinoy ang didto mipusta kang Oscar de la Hoya.

Sus, naunsa na man kini? Tungod sa paniguro lagi ilang gikalimtan ang paglaban sa atong kaliwat.

Tungod sa kwarta ilang gisalikway ang nasyonalismo ug ang pagmahal sa katagi nasud nga nakig away aron makahatag ug dungog sa Pilipinas.

Domingo, adlaw sa kombati. Gikan sa round 1 paingon sa pag undang sa round 8 kontrolado ni Pacman ang away.

Luoy kaayo si Oscar de la Hoya kansang lawas midawat sa kastigo sa nagpungasing mga kumo nga midapat sa nagkadaiyang bahin niini.

Kon wa pa undanga sa reperi ang away hayan mohawok sa canvass ang Golden Boy sa boksing.

Nan karon unsa man? MIRISI!

Makaayo sa nasud ang pag-oktaba sa piniliay
Nobyembre 30, 2008

ADUNAY posibilidad nga maoktaba ang eleksyon presidensyal sa tuig 2010. Alang sa mga ambisyoso nga magpresidente, sa nasud o kaha magbise-Presidente mag senador ba kaha hinoon dili maayo kining maong balita.

Apan alang sa giuhaw nga katawhan nga gisumhan nang mamati sa mga bakak nga mga saad, daw dagkong lusok kini sa uwan nga gihangop sa yutang gipagba sa hataas nga hulaw.

Binilyon ka salapi nga gastohon sa presidensyal nga piniliay nga igahin ngadto sa Commission on Elections.

Idugang pa niini ang kantidad pagpalit sa mga kahimanan tumong sa pagpakgang kuno sa panikas sa proseso.

Idugang pa gayod ang binilyon gihapon nga andamon tumong sa pagpadaug sa mga kandidato sa administrasyon.

Sus, kon kining bulto sa salapi ibubu pa pagtukod ug mga proyekto ug mehuras alang sa panginabuhian hayan makahaw-as kita gikan sa naghingaping kapit-os tingali makabayad kita sa dagkong mga utang; tingali dili na magpas-an ug daghang buhis ang katawhan; tingali dili manglangyaw ang atong mga paryente nga mahimong biktima sa pangabuso sa hayop nga agalon; tingali makakaon ug maayo ang atong mga anak, magsapot ug disente ug makaiskuyla ug tarong; tingali malinawon ang pagpuyo sa katawhang Pilipinhon.

Maayo pa nga ipadaplin una ang personal nga interes sa mga ambisyosong politiko.

Atong segurohon karon kon unsay makaayo sa katawhan kinsa sulod sa dugayng panahon gihikawan sa binuotan nga pangalagad.

Kitang katawhan kinahanglan nga dili na magpasagad. Kon maoktaba ang piniliay sa 2010 magpasabot nga lugwayan ang termino sa kasamtangang namunoan.

Nindot ni kay dili masugamak ang nasud s kaguliyang nga sagad sugniban sa mga pilderong kandidato nga dili moangkon ug kaparotan.

Posible maundang ang pangurakot kay dili na man makagasto ang naas poder.
Pabor kini sa katawhan sanglit makapaabot na man kita ug tinarong nga matang sa serbisyo gikan sa nahimatongon nga mga opisyales sa kagamhanan.

Ang mga sipsip
Nobyembre 9, 2008

ANG pulong sipsip Tinagalog. Sa binisaya nagkahulogan ug supsop. Ang bata nga nagsupsop sa totoy sa inahan nagkinahanglan ug gatas aron paghingilin sa kagutom.

Ang alimatok nga miukob sa kabaw nagsupsop sa dugo aron pagtagbaw sa kahangol niini.

Ang manogimpo (parisitic fungi) nga mitapot sa kahoy nagsupsop sa duga aron mabuhi.

Ang tawo nga sipsip mosupsop sa tanang kaayohan nga anaa sa iyang agalon.
Kwarta, sapot, pagkaon ug bisan unsa na lang paghatag og katumanan sa iyang pangandoy ug kapritso.

Ug siya mobuhat gayod sa tanang malimbungong pamaagi aron pagdani sa pagsalig sa iyang amo.

Ang mga sipsip sagad nimong mabantayan diha sa poder sa mga politiko. Tungod kay batid lagi sa mga tiknik pagkombenser ug pag-ulog-ulog sigurado nga sila makatagamtam sa pagpangga ug pagsalig.

Ang politiko nga nalingla sa plastik nga gawi mopiyal apil na ang mga impormasyon kabahin sa mga paninguha sa pangatungdanan.

Ang mga sipsip seloso. Dili sila makatugot nga adunay mga tawong hatagan og atensyon sa ilang amo.

Kadtong mga dikit sa ilang agalon mabiktima intawon sa mga pagdaot ug intriga.
Gub-on nila kutob sa mahimo ang kredibilidad aron sila maoy magpabilin nga bililhon.

Silabon ra ba panahon sa piniliay mahibaw-an na lang nga wa sila mosuporta sa mga kandidato sa ilang agalon.

Labaw nga hapdos palandungon nga wa gani sila mobotar mismo sa tawong ilang nautangan sa daghang kabubot-on.

Sus, mat-an pas pukot kining mga tawhana. Mga gradwado sa SIPSIP University.
Busa kamong mga politiko himbisi ug aninawa gayod pag-ayo ang kalidad sa mga tawong naa’s alirong.

Siksika sa makadaghan kon espeso ba gayod sa ilang lealtad. Basin baya sa kaulahian ug tition lang pagsupsop ang inyong dugo niining mga modernong DRAKULA sa katilingban.

Tsk… tsk….tsk…

Makapakitbi sa Atay nga Gukod
Nobyembre 2, 2008

Sa miaging Byernes petsa 24 kaming magtiayon miadto sa Tagbilaran aron paghapit sa gipuy-an sa bag-ong minyo namong anak didto sa Dao ug adto na kami manukad paingon sa barangay Banban lungsod sa Dimiao aron pagtambong sa bunyag sa among apo sa mosunod nga adlaw.

Normal ang dagan sa Rimon Transit nga among gisakyan hangtud sa lungsod sa Carmen.

Human sa dugay nga pagparking niini mipadayon ang among pagbiyahe. Apan niining higayona nausab ang dagan sa behikulo gikan sa ordinaryo ngadto sa pagkahinay kaayo nga sa nagbaklay kami.

Nagbagotbot ang mga pasahero. Abi namo og dunay depekto ang makina sa Rimon Transit kay luya man ang dagan niini.

Kaha gipugos lang pagpabiyahe sa tag-iya, pangijawat lagi. Aw wa tay mahimo magpiyong-piyong na lang.

Sayo ug diyutay sa Cabacnitan, lungsod sa Bilar, gitay-og kami sa kahikugang. Kalit lang mibulhot ang sakyanan sa makusog nga pagdagan.

Naghagoros kini ingon sa mapintas nga kabayo nga nakabuhi gikan sa kwadra. Sa among luyo nagsingabot na diay ang Clyn Transit No. 114-G nga na1gbadyong sa tumang katulin.

Mao diay kini ang gipasabot sa drayber sa Rimon. Ug nagsugod na sa karera. Nagpuli-puli ang pwesto sa duha ka sakyanan usahay maulahi depende kon mopik-up ug pasahero sagad magtapad sa kalasada naghagoros sa tumang kapaspas.

Ang kaganinang yagobgob sa hinay nga dagan nahilom na ug maoy mihulip ang negatibong panghuna-huna sa tanan.

Sus kon mosipyat uroy makaabot ba kahag ospital ang mga sumasakay. Tsk .. Tsk….

Naulahi ang among gisakyan sa Clyn sa pagbahada sa lasang, Bisan pa sa kalisod sa nagliko-likong agianan wa mausab ang timpo sa ginukdanay.

Sa unahan dunay multicab nga bulok asul ang pintura. Nahikurat pag-ayo ang drayber kay miovertake man ang Clyn bisan sa kahagip-ot sa lugar.

Miaksyon usab ang among gisakyan apan nabalda kay naniyabaw tanan sa kalisang.

Mibahad kami nga manganaog kon dili moundang ang nagmaneho sa kabuang niini.

Taym una pa, kamong tag-iya ug sakyanan nganong gitugotan man ninyo nga magduwa-duwa ug gukod ang inyong mga drayber?

Kon makadisgrasya simbako madugmok pa ang inyong trak ug magbago pa kamo sa dakong tulomanon sa mga biktima.'

Nganong duna may ginukdanay sa sakyanan, ang matag trak depasahero adunay gitakdang oras sa pagbiyahe sa ato pa dunay nangawat ug panahon niini.

Hangyo lang sa mga otoridad sa LTFRB hatagi kuno ug atensyon kini aron pagpakgang sa mga aksidente sa kadalanan.

Sa laing bahin magpasalamat kami nila ni Pare Boy Mare Bening Ometer ug sa tanang taga Banban sa inyong mainiton nga pag-amuma sulod sa duha ka adlaw nga pag-istar sa inyong barangay.

Halu JBBN. I wnt 2 gr8 ol da s2dnt in SBNHS spcialy IV-New2n. 2 Wena, Flor, Erlnda, Coray ug ne Hangaw2x. Tankz more pwer. –frm Anamae 2-Soy. 0909814…

JBBN, owning gr8 q xa mmbr xa BCF ug HCFN clan, bz jud mo mu mga toogs ug bagz esp gr8ngs xa mga cmenarian ja xa Tlo2 ug n Narl2 dha xa Crmen. Hoy, pgbnutan na, gara rka kaau. Enx po, Gdblez, & mre power. –frm Pig Pie. 0909814…

Gd eve JBBN ngau ko ka txtm8 kana boy iya age 24 up. 09186035989

Hlo kya JBBN pwd mangayo k og k txtm8 knang grl unya boutan iyang ega 25 pataas. Im J-R frm Crmen Bohol. 09098552750