KAUBAN sa pribadong sektor nga kaabag sa Department of Education (DepEd), gilagdaan na ang usa ka kasabutan alang sa libreng mga ante-ojos ug pagpaugmad sa panan-aw sa kabataan diha sa tunghaang pang publico.

Kini alang sa mas dan-ag nila nga kaugmaon. Matud ni Education Secretary Jesli Lapus, nagkadaghan na ang mga taga pribadong sektor ang misalmot sa kawsa aron hatagan ang kabataan sa dan-ag nga kaugmaon, dili kadtong ngitngit.

Ilawom sa programa nga “Vision and Mind Skills Program, ang "I Care" ug "Sight Care Program" magtutok sa pag-ugmad sa mga klinika nga magtuki sa suliran sa panan-aw sa mga bata aron sila kaabagan ug libreng samin kon mahibal-ang may suliran sa panan-aw.

Di ikalimod nga kining ingon niining mga lakang gikinahanglan sa mga kabataan nga nakit-ang nagkalisud sa pag-apas sa ilang mga tun-anan.

Apan kon ang nagkadaut nga panan-aw sa mga kabataan maoy tumong ning programa, angay usab seguro nga tun-an sa Dep-ed unsaon pagtambal sa nagkadunot nga panan-aw sa mga magtutudlo.

Kay kon ang suliran nia gyud sa panan-aw sa mga kabataan, sayun ra kaayo nga solbadon kini sa tabang sa pribadfong sector, kinsa mahimong makakuha ug 150% nga tax holidays.

Lahi man gud ang atong nasinati sa milabayng mga semana. Espuko mo ba, sa mga magtutuon nga nanaygon sa akong pobreng payag sa milabayng pasko, maihap ras tudlo tong mga bata nga makatunong paglitok sa garay sa mga kantag pasko.

Gikan sa Kasadya ning taknaan, jimball bells, zapped as the boys of an angels hangtud sa Tengk yo tengkyo, ang babait ninyo Takbo!

Wala kita makapugong sa atong kahingawa sa ugma pohon aning mga bataa.
Mahimo pod nga wa sila makakita sa gipakopya sa ilang maestra.

Pero sa kadaghan sa mga bata nga nanaygon, halos parehas ang ilang gilitok.
Mao gani nga kon tinuod nga seryoso ang Dep-Ed, iapil na ning mga maestra ug hatag, dili sa mga ante-ojos nga magpadan-ag sa ilang panglantaw.

Mas gikinahanglan sa mga magtutudlo karon nga madan-agan sa ugma nga itanyag nila ngadto sa mga kabataan.

Kay sa sayop nga ilang ihatag sa mga bata, kapid-an ka kaugmaon gayud ang segurong matuslo sa kaugmaong ngitngit pa sa alketran.

Hayahay Pa's Pulis?
Nobyembre 30, 2008

NAKAPALUTAW sa daghang mga pangutana ang labing bag-ong mga imbestigasyon nga naglakip sa mga labing-tag-as nga opisyal sa kapolisan.

Ana ra ba kasayon nga iduhig nato ang sayop ngadto sa mga tawong maha-apil sa kontrobersya?

Una sa tanan, ngano man nga mitugot man ang kagamhanan nga makakuha ang mga tawo sa mao kadako nga kantidad?

Kon nahitabo na karon, buot bang ipasabot nga sige na nang kahitabo nga makakuhag minilyon ang mga opisyal sa kagamhanan ug okay lang?

Nga sa ato pa, kon wala pa masakpi, wala lang usay bali? Kay gitugot sa kagamhanan, una sa tanan, tanan bang sayop adto na sa nagbitbit?

Tinuod makalolooy ang pulis, kinsa nakahibawo unta sa iyang angay nga buhaton adtong panahona.

Laing pangutana, nsa may kalabutan ning hitabo sa mga pamaagi sa pagpabaylo sa mga foreign currency ug ang pamaagi sa pagbitbit sa ingani nga kadaghanon paingon sa gawas?

Gibaniog na sa mga taho kon unsay nahitabo sa mga sakop sa PNP nga delegasyon nga motambong unta sa 77th Interpol General Assembly didto sa St. Petersburg sa Russia.

Gipara sila sa Customs didto sa Moscow International Airport kay nagbitbit ug halos P6.9M o 105,000 mil ka euro.

Una nga nalitse si PNP comptroller Eliseo de la Paz. Mao gani nga gi-anggaan na sila ug "euro generals".

Sa iyang testimonya sa Senado, si dela Paz mibutyag nga siya mismo may bitbit nga 45 mil euros agi ug gipamalihug sa iyang higalang negosyante kinsa magpapalit ug mga mahalong relos.

Uban usab ni dela Paz ang iyang asawa nga may bitbit usab nga US $20 mil isip personal nga bawon.

Kini, dugang niya, lahi pa kay sa nasakpang 105 mil euros. Sa kadaghan sa kwartang gibitbit sa usa ka opisyal sa kagamhanan, maka-ingon tag, tinuod jud diay nang “hayahay pas pulis”

Ug sa pangutanang giunsa ni dela Paz paglusot nga namilbil man unta siyag kwarta, segurado tang dala kadto sa iyang impluwensya.

May mga panahon sa nasud nga ang Bangko Sentral ng Pilipinas mipagawas ug Memorandum of Agreement ngadto sa mga ahensya sama sa PNP, Bureau of Customs, Manila International Airport Authority, Bureau of Immigration, Air Transportation Office ug Philippine Ports Authority.

Ang kasabutan nagti-nguha nga may epektibong pagpatuman sa mga balaod sa BSP, ilabi na gayud ang BSP Circular No. 308 ug Section 4 sa Circular No.1389.

Kini kabahin sa pagpalusot sa kwarta sa laing nasud ilabi na gyud ang peso. Matud sa Circular No. 308, ang si kinsang magbitbit ug sobra sa $10 mil nga mogawas o mosulod sa usa ka nasud kinahanglan na nga ila kining ideklara ginamit anmg usa ka opisyal nag forma alang niini.

Sa makalapas niini, may silot nga P50 mil ngadto sa 200 mil o pagkabilanggo gikan sa duha ngadtos 10 ka tuig subay sa Section 36 sa Republic Act No. 7653.

Kini usab nga sumbanan ang gipatuman sa ubang nasud agi usab ug pagpugong sa money laundering.

Matud ni kanhi BSP Gov. Rafael Buenaventura, padayon usab nga gimonitor ang pagpalusot sa mga kwarta subay sa 9th Special Recommendation of the Financial Action Task Force, kini maoy hugpong nga magtan-aw sa mga lakang sa mga nasud batok sa money laundering.

Ning bag-o, gipahi-numdumag usab sa BSP ang mga tinugyanan sa mga airport pagpapaskil kabahin sa memorandum sa BSP.

Simple ra man unta, ang pagdala ug sobra sa US$10 mil magkinahanglan rag imong ideklara pinaagi sa pagsuwat sa forma alang niini.

Wala hinuon kita kasayod kon kahibalo ba ang mga general sa kapolisan niini. Kon sayod sila apan kaya ra nilang ipalusot ang kwarta pagawas, nan nakatilaw silag pait sa pagpasulod na sa Russia.

Abi ninyog hayahay ang pulis? Kining simpleng buhaton sa pagdeklara di lamang manalipod sa nagbitbit sa dakong kaulawan, apan, apan makatabang usab sa nasud sa pagbantay nga dili ikapagawas ang kwartang gikinahanglan sa pagpadagan sa ekonomiya sa nasud.

Karaang Cancion
Nobyembre 16, 2008

BAHALAG yabag, basta mingaw. Sintonado, apan dagway’g kini nay tema nga gisagop sa mga na-apike nag inatras.

Hapit na’ng ma-ipit sa bongbong ang likod sa mga nakigbisog batok sa kagamhanan pinaagi sa kusog ug armas.

Sa panahon nga ang kalihukan nagsubay pa sa ideyolohiya sa kaangayan, dili lisud ang magpanghaylo aron makighiusa sa kawsa.

Lahi na ang gidangatan sa dihang ang kawsa nga kanhi gi-isa, giyatakan na sa mga ka-uban nga nakakita nag tumoy sa ilang paningkamot.

Isig paningkamot nag-laslas ang tanan aron makahipos ug abyan dihang nakita nilang matundag na ang gipalutaw nga rebolusyon.

Human atubanga sa kusog sa nasudnong militar, ug human masinati ang way puas nga kampanya aron maisbog paatras ang gi-tulak nga kawsa, hinay nga nahilis ang oposisyon.

Daghan na nga mga stratehiya ang gigamit sa kagamhanan. Sa mga lugar nga baga ang armas, gipa-asdang usab ang kusog militar.

Sa mga lugar nga napamingaw na sa gubat, arangkada usab ang mga ahensya sa kagamhanan aron magsugod ug bag-ong kinabuhi sa katawhan.

Sa wala madugay, daw isdang namad-an sa hunasan ang pag-bakyaw sa kamot batok sa kagamhanan.

Dala usab kini sa pagkabisto sa kawalay pulos sa ideyolohiyang gisagop nga dugay ra diayng gilubong sa mga nasud sa gawas.

Sa padayong ginagmay nga kaguliyang dala sa naghuramintadong pwersang buot pang mapalanog ang ilang nagkatumbang kawsa, dali nga nakigsabot ang mga lider sa mga rebelde.

Karon, sama niadto, gikan sa hayahay ug bugnawng nasud sa Netherlands, gilitok na usab sa mga lideres sa National Democratic Front (NDF) ang laing mandu.

Inay gyera taman sa loud, kay wala nay bala nga ikapaslak sa uhaw nga baba sa armas, niyabag ang tono sa ilang gilibkas.

Matud pa ni Senadora Jamby Madrigal, kinsa Senate Committee Chair sa Peace, Unification and Reconciliation, miadto sa Netherlands aron makigsabot sa kalinaw.

Didto, gidemanda sa NDF, matud ni Madrigal nga itagak una sa pwesto si Gen. Hermogenes Esperon.

Si Esperon maoy tigtambag sa kagamhanan alang sa proseso sa kalinaw.
Ikaduha, gidemanda nila nga ibalik ang Joint Agreement on Safety and Immunity Guarantees (JASIG).

Ang JASIG maghatag sa mga lider sa mga rebelde sa kasegurohan nga dili sila dakpon samtang may hisgutay pa sa kalinaw.

Apan dungan sa JASIG, daghang pagpangatake ang nahitabo, samtang gisakyan ang napagdayong cease-fire dala sa paghisgutay.

Kini usab maoy gihi-mong panahon aron magkatapok ug balik ang mga terorista ug nag-tigum ug kusog.

Sa medyo lig-on na usab sila, kalit lang kining miwelga gikan sa hisgutay sa kalinaw, butang nga gikasakit sa kagamhanan sa dagwayg lipot nga nahitabo.

Niini, iyang gisuspenso ang JASIG. Karon, sa nagkaluya nga pakigbisog, mi-entra si Madrigal aron mahipos na usab ang nagkatibuwaag nga pwersa.

Makigsabot na sila human sa ilang pagtraydor sa ka-gamhanan. May katungod pa ba ang NDF nga modemanda sa ka-gamhanan?

Matud sa Malakanyang, wala. May katungod ba usab si Madrigal nga ipamugos sa Malakanyang ang demanda?

Wala. Isip pangulo sa usa ka Komitiba sa Senado, mahimo niya ang iyang tanang gustong buhaton, apan dili kini makapugos sa Malakanayang nga sundon ang iyang mandu.

Kay ang demanda sa NDF mao na usay himoon nga panahon nga magkatapok ug balik ang nagkabungkag na nga pundok sa mga rebelde.

Karon, kay mao may ilang gustong mahitrabo nga mag-agbat sa kusog, nan, nia na ang bunal nga walay tihiktihik.

Dili kini makitawhanon pana alang sa mga hayop nga dugay nang nagsungag aron lumpagon ang kaugmaran, angay na silang hiposon sa makausa pa.

Mipalubad dayon ug madrigal ang usa ka politikong bout makakuhag suporta sa mga tawong supak sa kagamhanan.

Hinuon, sama sa iyang ngalan, ang madrigal na-uso sa Europa sa panahon pa ni Mampor, kanta nga murag nagdalag pagpanglimbawot sa balhibo kay karaang cancion.

ON THE AIR na usab karon ang gyera sa mga dapit sa Mindanao, ang naghulga nga bawod sa ekonomikanhong krisis nga makalumpag sa ekonomiya ug ang laing hulga sa impeachment batok kang Presidente Gloria Macapagal Arroyo.

Niining higayona, iya na usab nga gipanawagan on the air ang usa ka cease-fire sa mga politikanhong lihok nga sama sa impeachment.

Kini dili tungod kay siya miangkong sad-an. Kini tungod kay dala sa pamatasan, angay usab nga atubangon niya ang sumbong, sama nga kinahanglan niya ang tanang niyang kusog aron pangitaan medyos ang mga suliran nag gisagubang sa nasud.

Kini aron hingpit na nga matutukan sa atong mga lider ang hulga sa ekonomikanhong bawod nga posibleng mobanlas sa nasud sa dili madugay.

Napangandaman man sa Pilipinas sa hulga sa pangkalibutanong krisis, wala magtuo ang mga lider sa nasud nga matay-og ang lig-ong ekonomiya sa Estados Unidos, bisan pag kini nakapahugno na sa ekonomiya sa Iceland.

Andam na, apan dili sa dagkong bawod nga mahimong mobanlas ug magpapukan sa presyo sa paliton nga maoy direktang maapektohan sa krisis sa tibuok kalibutan.

Gani matud sa usa ka international ratings company, ang Pilipinas, bisan sa pagpanglutaw sa unbang nasudnong ekonomiya dala sa nagpangabugtong pundo piskal, usa gihapon ka isla nga wala mairog sa hulga.

Apan dili kini molungtad hangtud sa hangtud. Mao nga aron unta maseguro nga ang atong tanang depensa tua magtion sa umaabot nga bawod, unat dili na magsigeg samok-samok ang mga pundokoy nga mitan-aw sa panahon sa kaguliyang nga hinog nga higayon aron lumpagon ang bahi nga liderato.

Sa panahon nga hiusahon unta sa Pilipinas ug katawhan niini ang pagsagubang sa hagit sa global fianancial crisis ug sa pagpangitag ginagmayng solusyon sa kaguliyang, nia pundok nga ang buhat mao ra gayud ang pagpugong nga walay mayo nga mabuhat ang administrasyon.

Niini, ang Presidente nanawagan ug naghangyo nga unat ang “atong mga komunidad maghiusa ug iadaplin una ang personal nga walay pagsinabtanay ug politikanhopng kalahian aron katutokan ang mga posetibong mabuhat aron ma-uswag ang kinabuhi.

Kini aron mabuhat sa kagamhanan ang iyang gimbuhaton, ang pagpanalipod sa katawhan gikan sa kalit-kalit nga pagsugwak sa presyo ug ekonomikanhong hulga.

Sa panawagan, mihimo na ang League of Provinces sa nasud sa usa ka resolusyon sa pagpadayag ug suporta sa Presidente agi ug tubag sa laing sumbong sa impeachment nga gitangas nagdto sa Presidente niadtong Octubre 13.

Matud sa LPP, ang lakang wala sa tukmang panahon, makabungkag sa panaghiusa ug supak sa nasudnong interes ilabi na kay kamolo ang kagamhanan sa pagsagubang sa ekonomikanhong hulga sa krisis.

Dungan sa panawagan sa LPP, ila usab nga gihangyo ang Catholic Bishops Conference of the Philippines ug samang mga pundok nga makapa-aghat ug bagang katawhan sa dili pagsuporta sa makapabungkag nga lakang.

Matud sa LPP, kasagaran ang impeachment may gamut nga politikanhong kayugot, makapabungkag ug makadaut sa kadaghanan sa katawhan.

Wala man kita magtuo nga makaabot ang impeachment sa iyang tumong nga pagpukling sa liderato sa atong Presidente, ang pag-ON THE AIR niini maghatag na usab ug laing rason sa mga politico nga magpadunyang sa ilang tiyan atbang sa camera aton tagamtamon ang libreng pagpasikat.

Unya, kinsa na man unya’y makapanapo kon ma “on the air na pod ta pohon sa kalisud?

Sila ba?

Makaulaw, matud pa ni kanhi Presidente Joseph Estrada, nga ang Pilipinas, hingsapong na sa mga labing kurakot nga nasud sa kalibutan.

Kon kini nga pamulong gikan pa sa usa ka ligdong nga Juan de la Cruz, dako kini nga tamparos sa mga angay manubag nganong nahitabo ni.

Apan gikan sa usa ka kanhi Presidente nga namatud-an sad-an sa pangurakot ug nasilotan sa pagkabilanggo sa pagpangawat, mao unta ni ang katapusang iyang tukibon.

Kay mura ni siyag nag-ukang sa iyang kaugalingong kugan. Mao nga para nako, di ni balita.

Hinuon, tamparos alang natong nasayod nga may nangawat sa kaban ug atong gihapong tagaan sa atong panahon aron kini na poy kawaton.

Dugang niya, mahimong modagan siyag balik pagka pangulo sa nasud sa 2010.

Kini hinuon, murag balita, murag dili. Aw, ingnon nalang nato nga balita para way samok.

Balita ni sa mga hangtud karon, mituo nga ang nakawat ni Erap, gamay ra sa ingnon tang pasangil nga nakawat sa mga naglingkod karon.

Balita ni para sa mga tawo nga mituo nga ang pamaagi sa pagka-pangulo ni Erap, mao pa gihapoy labing maayong paagi pagpalingkawas sa Pilipinas sa kalisud.

Nga ang pag-unja-unja sa mga buhaton sa kagamhanan okey ra.
Basta naa pay tagay, pista ug lingaw-lingaw, sagdi ra gud na?

Mao ra gihapon, kay kon di ka mo-enjoy karon, matigok man gihapon ta ugma, di sayang na hinuon?

So, modagan si Erap kon dili magkasinabot ang oposisyon kon kinsa nila ang may labing maayo nga sistema sa pagpadagan, o pagpalukapa sa kagamhanan.

Tugbang sa iyang abogado nga si Koko Pimentel, wala pay balaod nga magdili ni Erap pagdagan, (gawas sa iyang tuhod nga pirme nalang ug pabuyag).

Wa ta masayod kon ang pagkapriso sa sala nga kriminal, pananglit sa dinagko nga pagpangawat sa kaban sa kagamhanan, dili ba magpugong sa usa ka tawo nga molansar.

Kay sa akong nahibal-an, bisag may gamay kang sala nga makapapriso nimo sa unom ka buwan, dagwayg, maglaway na sa sa pagpangatungdanan.

Apan kay di man ta abogado ug topnotcher sama ni Koko, di ta makaingon nga babag na sa tukar-tukar nga ambisyon ni Erap ang iyang pagkasentensyado.

Para nako, si Erap na lang bitaw. At least, ang tawo namatud-an nga makamao mamahin.

Iyang gipang-apod-apod ang iyang mga nakawat ngadto sa iyang mga kamag-anak, kaibigan ug kahit kanino na lang.

Niini, daghan ang nikalit ka-adunahan. Dili sama sa naglingkod karon nga angay-angay ang mga kabus nga hinayng gi-asnat gawas sa kawad-on.

Dugay. Perting dugaya. Mao gani nga sa pag-ingon pas akong amigo kon moadto ba ko sa mga functions ni kanhi Presidente Erap dinhi sa Bohol, ako siya gipangutana?

Unsa may akong mapaabot nga bag-ong balita sa usa ka newsmaker nga laos na?

Ako dayong gisum-payan, “gusto ko ug news, dili olds”.

GIKAN sa usa ka kanhi pulis sama ni Senador Ping Lacson, nagsalig ta nga ang iyang ipabuto, dili kabhang.

Apan tungod kay PING, wa kaigo. Tapsing. Inay makabungol ug sipa kaayo nga salba aron makapahikurat, PING ug dili BANG ang naabot sa iyang expose.

Kalit lang daw may nakita si Senador Lacson nga gisukip nga badyet alang sa 51 kilometros nga C5, o karon gitawag na’g Carlos P. Garcia Avenue.

Nakit-an ni Lacson nga may P200M nga nasulod sa General Appropriation sa 2008 alang sa proyekto sa 51 kilometro apan 30 kilometros pa ang nahuman nga C5 extension gikan sa SLEX paingon sa Sucat, Parañaque.

Laing pundo ang nakita pa, kini ang P200M nga Urgent Infrastructure Including Local Projects.

Matud ni DPWH Secretary Hermogenes Ebdane, ang proyekto sa Pres. Carlos P. Garcia Avenue nagkinahanglan pag P2.6B aron matapos.

Gipatin-aw usab ni Budget Secretary Rolando Andaya nga ang kontrobersyal nga P200M nga gisukip dili pakana sa Malakanyang apan gisugyot sa Kongreso, sumala sa napakita sa telebisyon.

Buot ipasabot niini, kini si Lacson may selective memory. Buot ipasabot nga mahalimot ni siya sa iyang gibuhat kon gusto niya.

Sama pud nga makahinumdom lang ni siya kon iyang gusto. Mao nay rason nga bisan ang iyang mga kauban kanhi, sama ni Sen. Allan Peter Cayetano nga karon misaad nga mokalas sa gang.

Usa ka bahan sa oposisyon ang gilangkoban niadto ni Ping ug Cayetano, apan sa karong milagro ni Ping, miatras si Peter.

Mismong Tsirman sa Senate Blue Ribbon Committee si Cayetano, ug sa iyang pamahayag tubag kang Lacson, gihilasan siya nga nagtan-aw nga buot ihulagway sa kanhi polis nga siya lang ang maayong polis didto.

Mismo si Cayetano nauwaw sa gibuhat ni Ping, kay pataka na lag paghot, nagpalaban pas media, unya sila ra diay sab sa Kongreso ang maulawan.

Mao gani nga inay mahikurat ang mga kauban nga Senador, halos nangantyaw na ang tanan kang Lacson nga naghupot sa iyang dakong paboto, nga igo na lang mikanoos.

Ang pait pa niini kay mismo kauban niya kanhi miingon nga mobuwag na sa ilang gang.

Dili sa Cripps. Dili pod Bloods. Pulos Intriga Nalang Gang. Sa mubo nga pagkasulti, PING.

PILA na ba ka salida sa sine ug telebisyon nga nagpakita nga ang kapolisan moabot sa eksena sa krimen sa pagkahuman na sa kombati?

Unsa kaha poy rason niini? Klarohon ta ni. Dili tungod nga kay magbalantay sila sa kalinaw, linaw na kon moabot sila.

Ning buwana, atong gisaludo ang mga Pinoy nga nalambigit sa paghatag ug serbisyo sibil, syempre, lakip na ang mga pulis.

Kini usab sila, may mga tighulma na ug nasudnong palisiya, duna poy tua nagpa-init sa daplin sa dalan samtang nag-um-om sa silbato samtang nagapatuman sa balaod trapiko.

Gani, ning panahon nga gi-angga-an na ang uban kanila nga pulis-patola, labing gikinahanglan nga ato usab sila nga ilhon, taliwala ning dakong hulga sa kasamok, nagkadyutay nga pagsalig sa kagamhanan ug sa giingong nagkadunot nga dugokan sa Pilipinhong diwa, nga misuhot na sa kapolisan.

Ning semanaha, nahimamat nato ang kapin kon kulang 600 ka mga babayeng sakop sa pwersa sa kapolisan.

Nia sila dinhi sa Bohol aron paghimo sa ika lima nga biennial summit. Ato usab nga nabati ang ilang mga ginagmayng suliran.

Nasabtan usab nato ang ilang dinagkong problema. May mga babayeng sakop sa kapolisan, nga inay tan-awon ang merito sa ilang katakus aron kahatagan sa saktong promosyon, gipamihuslan.

Ang ilang tudlo nga unta adto mahanas sa paghupot sa batuta ug gatilyo, natorse na hinuon sa dungan-dungan sa tasa sa kape.

Sa tanang cuerpo sa kapolisan sa nasud karon, buot na nila nga may babaye nga pulis nga maglingkod isip desk officer alang sa mga sensitibong kaso batok sa kababayen-an ug kabataan.

Matud nila, at least na lang, may inahanong pagtan-an ang ilang makita kon mosumbong sa kapolisan.

Gipaabot nga ang labing init nga tigpasupot sa programa sa pag-usab sa dagway sa kapolisan makalingkod isip Chief PNP.

Si General Jesus Versoza nagtanyag sa iyang kinabuhi aron sugdan ang delikado, ambisyoso ug murag way padulngan nga programa sa problemadong pwersa sa nasud.

Apan samtang anaa pa ang balaod nga magpugong sa promosyon ni bisan kinsang pulis nga may nag-ong-ong nga kaso, dili pa kita makaingon nga gawasnon na nga magbuhat sa ilang gimbuhaton ang kapolisan.

Mismo si Gen. Leopoldo Bataoil mi-angkon nga naka-lingkawas lang siya sa kaso sa iyang kaugalingong paningkamot.

Kadtong mga pulis nga wala intawoy motabang, ug igo nga kaisug nga manalipod sa ilang kaugalingon, mag-unsa na lang?

Ang balaod nga maoy nagtukmod sa kapolisan sa pagbuhat sa ilang mandates, karon mao ra usay magpugong kanila nga dili magtininuod sa ilang buhat kay basin makom-promiso pa.

Tingali angay ning matan-aw sa mga magbabalaod. Kon kon pasagdan lang kini, ang atong mga kapolisan nga civil servants kinsa anaa kanunay sa atong kiliran, uban kanato sa atong mga kalampusan isip nasud, walay kaluya nga naghatag sa serbisyo ug panalipod nga atong gikinahanglan aron matinuod ang atong mga damgo, mahimong motago na lang sa atong luyo.

Mao kaha nay rason maong gitawag na silag magbalantay sa kalinaw?

LAIN na pud nga P3.13B nga pundo ang buhian sa nasudnong kagamhanan aron ipa-ayo sa mga dam sa tibuok nasud.

Sa katapusan, maayo ra gyud tingali ang wala pa mahuman nga P165M nga dam nga hangtud karon, uhaw pa sa pundo.

Bisan ug mingkuot na sa iyang bulsa ang Kapitolyo aron lapawan na ang nagbuog nga persepsyon nga may nakakwarta na bisag wala pa maka-ani ang mga angay mabulahan.

Sa mubo nga pagkasulti, naay persepsyon nga may katugayunang napun-an ug nadugangan ang listahan sa mga Bol-anong tubig-tubigan.

Mibuhagay ang persepsyon nga ang uga na ang kaso sa P165M nga dam sa Bohol.
Kini bisan pag human sa upat ka tuig, naitos na ang atong pasensya sa kadugay sa desisyon sa kiha kabahin niini.

Nabangkong man ug huwat ang mga Bol-anon sa hukom, sa katapusan gipa-walay sala sa Ombudsman kay wala sila makakita ug bug-at nga rason nga pakasad-on ang mga akusado.

Dungan usab niadto, midagook ang paersepsyon nga nabija na jud ang P165M nga kiha.

Misuway mag pa-apas si Manlalaban Artemio Cabatos ug usa ka mosyon, mas daghan ang mituo nga way pulos na ang tanan kon naa pay padayon nga impluwensya nga dupa alang sa kaso.

Matud sa Ombudsman, wala pa gani mahuman ang proyekto mao nga wala pay tataw nga post-audit sa Commission on Audit (COA) mao nga dili pa madetermina ug may nahitabo bang katingalahan.

Nga murag ang mga Bol-anon mas ayo pag ilong sa taga COA kay mas sila may nakapanimaho sa bakag nga mialisbo gikan sa minilyon nga pasilidad sa patubig.

Diha na man guy unta’y una nga mga findings sa NIA Fact Finding Team nga may edidensya nga may sad-an gyud.

Diha pay laing desisyon sa Ombudsman nga duna gyuy bug-at nga ebidensya nga may iregularidad ang pagpatuman sa proyekto.

Apan sa laing audit ang gipasupot niadtong 2003 nga nag-ingon nga 49% pa sa proyekto ang nahuman, ug P165M na ang nagasto.

Duha ka tuig gikan adto ug human mapasa ang kiha, dihay gigaling nga rekomendasyon sa pag-dismiss sa kaso kay kuwang ug ebidensya.

Napuna-an na pud hinuon ug laing pundo aron humanon ang patubig, sa paningkamot ni Gob. Erico Aumentado.

Hurot na ang pundo nga P165M, wa pa mahuman ang proyekto, ug aron mapuslan na, gipagawasag pundo gikan sa Probinsya.

OK ra sa mga taga Bohol. Kon mapasupot sa Kongreso ang P1.4T nga budget, may pundo na usab sa nasudnong kagamhanan nga modaguok padung sa dam.

P3.13 billion ang gipahat sa kagamhanan aron gamiton sa mga patubig sa tibuok nasud.

Kapin sa 85,500 ka ektarya nga humayan ang makapahimulos niini, butyag ni Agriculture Secretary Arthur Yap.

Sa posibilidad, segurado tang mangalero na pud ang atong humayan. Wala lang ta kaseguro ug ug lakip ba pud ang kang kins ganing bulsa ang moborot.

Kon akoy pangutan-on, unta, dili lang bulsa ang matubig-tubigan sa dam?

Halu JBBN. I wnt 2 gr8 ol da s2dnt in SBNHS spcialy IV-New2n. 2 Wena, Flor, Erlnda, Coray ug ne Hangaw2x. Tankz more pwer. –frm Anamae 2-Soy. 0909814…

JBBN, owning gr8 q xa mmbr xa BCF ug HCFN clan, bz jud mo mu mga toogs ug bagz esp gr8ngs xa mga cmenarian ja xa Tlo2 ug n Narl2 dha xa Crmen. Hoy, pgbnutan na, gara rka kaau. Enx po, Gdblez, & mre power. –frm Pig Pie. 0909814…

Gd eve JBBN ngau ko ka txtm8 kana boy iya age 24 up. 09186035989

Hlo kya JBBN pwd mangayo k og k txtm8 knang grl unya boutan iyang ega 25 pataas. Im J-R frm Crmen Bohol. 09098552750