Proyekto Di Angayan Ipasigarbo
Enero 18, 2009

Walang plastikan ug pagpakaaron ingon! Viva Sr. Sto. Niño. Hala Bira! Akong pagtimbaya ug ingon man sa akong pamilya sa tanang magbabasa sa lungsod kinsa magsaulog sa ilang kapistahan karon.

Way paglaban sa katawhan
Desyembre 21, 2008

TIMAN-AN ta ug ilubong ngadto sa lubnganan sa kalimot ang mga kanhi ug nagpabilin nga sakop sa konseho sa lungsod sa Anda nga nagpakahilom ug daw wa magpakabana sa kalit nga pagsaka sa singilan sa tubig nga way tukmang ordinansa nga gibasehan niini.

Gipili kini sila aron pagdala sa tingog sa katawhan nga dili kini malupigan ug mag-antos pagpas-an sa dugang kalisod ning krisis nga gisagubang karon.

Ang pag-usbaw sa singilan sa tubig nga way kuryenteng gigamit nilugdangan kini sa pag uyon niadtong usa ka resolusyon nga gipasar kanhi sa mga sakop sa konseho aron pagtugot nga makahulam og igong kantidad ang LGU ngadto sa bangko.

Alaot kitang mga tawo nga apektado ilabina kadtong gikan sa pito ka barangay.
Bunga na kini sa pagbaligya sa atong mga boto ug sa pagpanghaylo sa kaon ug inom diin misumbalik ngadto sa atong pag-antos tungod kay ang kadaghanan sa gipiling mga sakop sa konseho way kahingawa paglaban sa interes sa kinabag-an.

Kon dili ang ilang gilabanan mao ang unsa mang gusto ug tinguha ning kasamtangang liderato nga dunot ug way kaluoy.

Apan salamat na lang tungod kay sila si Besi Mayor Ayot Deligero, Kag. Oting Makinano, Kag. Teting Tinio ug Kag. Lutchie Tongco mipakita kini og pagliskohag batok ngadto sa liderato sa kasamtangang hepe ehekutibo, tungod kay dili na masud sa ginhawaan ang pagduma sa renda sa pangatungdanan ilabi kalabot sa hulam nga salapi gikan sa bangko.

Pito lamang ka barangay ang nakapahimulos sa P8 milyones nga gihulam sa bangko.

Maoy gituohan nila ni Besi Mayor Deligero ug Kag. Oting Makinano nga makaayo ang paghulam sa maong salapi hinungdan nga sila mipirma sa resolusyon.

Apan ang maong proyekto wala mahuman ug gipatuman ang taas nga singilan sa tubig.

Bugtong misupak sa maong paghulam si Kag. Enie Makinano, apan wa kini hatagi og pagtagad sa mga kaalyado sa mayor.

Atong timan-an nga karong sunod tuig 2010 dili na ta magpahaylo!

Nganong karon pa
Nobyembre 9, 2008

Hapit na sab ang 2010 piniliay. Kagaw sa politika mihinay-hinay na usab og gimok aron paglingla ug paghangyo sa tagsa-tagsa ka galamhan sa katawhan.

Saad didto, saad diri. Ingon niini kadtong nagtinguha nga modagan diha sa natad sa politika.

Namatikdan karon ang mga nagtinguha nga modagan sa 2010 piniliay sama ni kanhi Kongresista Iladio Jala mihinay-hinay na usab kini og panikay-sikay pagduaw sa mga lagyong kabarangayan aron pagpahingung sa mga opisyales sa kabarangayan sa tinguha niini pagdagan pag-usab sa posisyon pagka Kongresista isip maoy puli na usab sa anak niining kongresista nga si Kongresista Adam Jala sa ikatulong distrito.

Nasayran nga ang kanhi Kongresista miduaw kini niadtong milabayng Lunes Oktubre 20 didto sa Barangay Badiang ug mihapit sa Barangay Hall sa Suba.

Mibali usab kini nianang pagka Sabado Oktubre 25 aron pagsaksi ug pagsubo sa duha ka lawak saringan sa Barangay Casica nga bag-ong nahuman ug gikan sa CDF ni Kongresista Jala.

Atol sa pagsubo, namulong ang kanhi Kongresista atubangan sa mga opsiyales sa barangay Casica.

Aduna na kunoy kwarta nga gigahin alang sa panubig sa kabasakan sa Anda partikular diha sa Barangay Tawid ug Casica.

Ang mga saad nga gibutyag nindot paminawon. Apan ang pangutana, nganong niadtong panahon sa termino niya wa man hatagi og igong gahin ug pahat gikan sa CDF niini ang nahisgotang panubig?

Angayan gihatagan unta kini og pagtagad aron mousbaw ang produksyon sa pagkaon nga dugay nang gihandom sa katawhang Andahanon.

Karon na lang sultihan ang katawhang Andahanon? Tungod kay magpapili ka pag-usab?

Diin man daan ang kanhi Kongresista nganong wa man hingosgi niadtong panahon nga diha pa siya sa puwesto?

Ang lungsod sa Anda gimantinilan lang og putol-putol nga pag-semento sa pipila lamang ka piniling mugbong mga dalan nga kapin kon kulang ngadto sa P90 milyones nga CDF.

Kahinumdoman nga ang kanhi Kongresista usa sa kaalyado ni GMA niadtong gilusad ang people’s initive aron pag-usab sa Batakang Balaod.

Usa kini sa milagda aron sa tinguha magpabilin sa puwesto ug padayon nga lugwayan ang termino niini, kay mahitbao man unya nga sa pag-usab sa Batakang Balaod isukip ang paglugway sa termino sa nangatungdanan.

Unya kay magpapili man pag-usab, lahi na usab ang baroganan niini kalabot sa Cha-Cha.

Segun sa pamahayag niya, dili pa karon angayan usbon ang Batakang Balaod tungod kay ania kita nag-antos sa kalisod ug mogasto ang kagamhanan og salapi alang sa maong tumong.

Unsa mang matanga sa politiko ang kanhi kongresista, maayo lang ni diay og makapabor?

Operator sa pagtikad sa minerales nakatuman ba?
Setyembre 14, 2008

Angayan gayod nga higpitan pagsusi ug ipatuman ang unsa may nakalatid nga probisyon sa balaod pagtikad sa mga minerales dinhi sulod sa lalawigang Bol-anon.

Kinahanglan matag operator o aplikante moagi gayod sa makuting pagproseso sa way pabor-pabor.

Namatikdan karon ug nasandan na nga sagad kon ang lungsod adunay tataw ug gitumbok nga potensyal sa mga minerales, sakyan kini sa anaa sa gahom ug maoy mo-kontrol niadtong mga interesadong motikad sanglit anaa man lagi ang katungod sa hepe ehekutibo ang pag-isyu og permit sa dili pa ipahigayon ang operasyon pagkubkob sa mga minerales.

Daghang higayon diin ang lungsod kon positibo sa deposito sa minerales, ang mga anaa sa gahom maoy magbuot kon kinsay hatagan niini sa prebilihiyo pagtikad labi na kon dunay naglambigit nga dinagkong “cash-sabotan”.

Gihimo karon nga kapital ang gahom nga gihuptan nga unta dili man kini dumalayon ug dunay kataposan.

Daghan karon nga anaa sa gahom ang nabulahan ug nagpahimulos sa mga minerales tungod ba kaha sa mga dagkong padalngog nga gitanyag sa mga mamohunan?

Gipaagi ba kaha sa saktong proseso ang matag operasyon pagkubkob sa mga minerales?

Dunay mga huhungihong nga dili man kini susihon sa mga hingtungan. Ambot ba, kahibulongan sab.

Nganong daw walay nangusog pagsusi kon nakatuman ba kini sa mga rekisitos?
Dili hinuon kalikayan nga mosantop sa mga huna-huna kon duna bay tigpanalipod ning tanan ug apil sa bahin?

Pastilan baya, halos hakgomon ang tanan tungod sa kahakog? Kulang na lang ibaligya ang tibuok lungsod.

Kining gihimo karon pagkontrol karon sa mga hingtundan sa mga potensyal nga deposito sa minerales sa mga lungsod, luoy kaayo ang mga tag-iya sa yuta diin nahimutang ang maong deposito sa minerales.

Gawas nga dili maayo ang pagkabahin ngadto sa tag-iya, delikado usab ang maong dapit kon pananglit kini mahugno ug malubong buhi ang mga molupyo nga nagpuyo dapit nga gipahigayon ang pagmina.

Sama sa nahitabo nga pagdahili sa yuta didto sa Guinsawgon, Saouthern Leyte, labina kon ang operator walay gibutang nga safety net.

Ang maayo sigurong buhaton sa mga tag-iya sa yuta diin anaa ang deposito sa mga minerales, nga magporma sila og kapunongan.

Ayaw kamo sugot nga hawakan lamang kini sa usa ka politiko. Kinahanglan kitang katawhan, magpakita nga maoy gamhanan.

Kini maoy gilatid sa atong batakang balaod, nga ang kagawasan anaa sa katawhan, ug tanang gahom nagagikan kanila.

Mabuhi kitang katawhan! Walay malupigon kon walay magpaulipon!

Dili hugot nga seguridad
Agosto 10, 2008

Kinsay angayan basulon pag-kidnap sa usa ka dalagita samtang nag-inusara sulod sa panimalay sa Sitio Ila-od, Sta. Cruz, dili pa lang dugay?

Ang mga responsable matod pa yano lang kaayo nga mibuhat sa ingon sanglit ang Sitio sa Ilaod ug Porcenas nagpahigayon og dungan nga kalihokan nga treyompo sa santos debosyon.

Ang gipuy-an sa biktima medyo layo sa mga silingan. Sa pagbuhat sa maong krimen, malagmit adunay molupyo sa maong dapit nga maoy nagsilbing look-out o dili ba adunay taga laing dapit nga nagpasumangil nga mamaligya og bisan unsa aron maniid?

Aduna kiniy posibilidad labina kay uso karon ang human trafficking aron gamiton sa prostitusyon o dili ba ibaligya ang organ sa lawas ug uban pa.

Kiniy nahitabo tungod sa kakulang pagpakabana sa seguridad (lack of security measure) kay daghang pinili sa katawhan nga nagpapalit sa boto ang wa magpakabana sa ilang kaakuhan.

Daghang napiling opisyales sa kabarangayan nga way mga hanaw pagpatuman sa seguridad sa matag jurisdiction ug maoy gihuna-huna ang matag buwan nga honoraryo ug ang bunos matag pasko?

Adunay mga barangay tanod apan daw mao ray ilihok kon panahon nga adunay panghitabo. Dunay ubang barangay sa lungsod nga adunay barangay tanod apan ang gipahingusgan lamang mao ang paghigpit sa katungod sa katawhan nga makapahimulos sa mga buhi sa Diyos sa kadagatan nga karon gihimo nang santuwaryo ug sa hilom mao pay mangunay pagpamukot imbes nga magpatrolya sa tibuok palibot (sa barangay).

Kining nahitabo nga pagdagit sa batan-ong tinun-an nga kanhi misalmot sa Miss Anda way laing angayan basulon mao ra usab kitang mga botante nga nagpili sa mga barangay opisyales.

Atong sugyot sa mga hingtungdan nga, matag barangay magbinantayon kanunay. Matag sakyanan nga mosulod sa teritoryo labina panahon sa kagabhion sitahon ug irehistro ang plaka niini, kon mahimo pangayoan og identifaction.

Ikaduha, kinahanglan ang barangay tanod mohimo og diplomasyang pagsita ngadto sa mga dayo nga magpalabay sa ilang dapit kon asa ang kagikan niini ug ingon man identification ug angayan nga irehistro kini ngadto sa barangay hall sa dili pa sila makahimo og mga transaksyon.

Ikatulo, kon adunay mga sakyanan nnga mohunong labina kon katingad-an kini, sitahon gayod sa mga hingtungdan.

Kon mahimo susihon ang sulod niini kay basin kini maoy gamiton pagpang-kidnap. Ika upat, sa mga panimalay dili unta biyaan nga mag-inusara ang mga anak, labina kon mga dalagita kay dili kita makasiguro bisan adlawan tungod kay dagsang usab karon ang mga adik sa katilingban.

Dili dayon ablihan ang pultahan kon dunay manuktok, kinahanglan sutaon una kon kinsa. Ang panghitabo nga pagdagit sa usa ka batan-on magsilbi untang leksyon nga angayan panaminan sa lungsod sa Anda nga hangtod karon walay sakyanan nga sarang magamit sa mga polis pagresponde kon adunay mga panghitabo nga nagkinahanglan sa ilang serbisyo.

Ang pagkahanaw sa dalagita nagpabiling usa ka tanghaga. Adunay mga pangagpas nga kini milayas, adunay nagkanayon nga basin adunay recruiter nga nag-aghat niini.

May nagpaluyo ba sa wala pagpatik sa Flower Beach and Diving Resort?
Agosto 3, 2008

Kaniadto wala mailhi ang lungsod sa Anda. Apan sa dihang gisugdan pag-ugmad ang mga maputing kabaybayonan ngadto sa mga beach resorts diin gipangtikad ug gipanag-iyahan sa mga malampuson ug gipanalanginang mga lumad Andahanon, lakip na usab kadtong mga langyawng magpapatigayon kinsa mibubo og puhonan, inanay nang nagmata ang kanhi nahikatulog nga lungsod sa Silangang bahin sa Bohol.

Mianam usab pagdako ang kita sa panudlanan sa lungsod tungod sa mga buwis nga gibayad sa mga magpapatigayon kinsa migasto og minilyon nga kantidad diin ubay-ubay usab ang misulbong karon nga mga resort.

Ang subo lang palandungon, kay daw dili maayo ang gipakitang pagtagad sa mga tinugyanan sa turismo sa lungsod ngadto sa usa sa mga resort.

Ning gipahigayong Sandugo Festival, ang lungsod sa Anda adunay mga booth nga gipahiluna sa dakbayan sa Tagbilaran nga nagpakita sa mga atraksyon sa lugar niini nga hayan makapadani sa mga kustomer nga kasagaran mga turistang langyaw.

Ambot kon gituyo ug pagbuot ba sa kahigayonan o dili ba nagdanghag ang mga tinugyanan sa turismo sa Anda, tungod kay wala man maapil og patik ang Flower Beach and Diving Resort sa mga brochure nga gipang-apod-apod atol sa maong kalihokan.

Wala ba diay magbayad ug makatabang ang maong resort diha sa panudlanan sa lungsod? Unsa kaha ang hinungdan ug rason sa mga tinugyanan sa lokal nga turismo sa lungsod nganong nahitabo man kini?

Ang tag-iya sa maong resort usa ka modelo ug ehemplo sa tanang mga beach resort sa lungsod. Sama sa pagpamalit sa mga yuta sa ensakto nga presyo, dili susama sa uban nga daw hapit na lang pangayoon ang yuta ug matod pa apilan og panghulga niadtong mga inosenteng tag-iya sa yuta?

Basin nalimot kining mga tinugyanan sa lokal nga turismo sa mga kalungsoran nga ang ilang tahas mao ang paghimo og information campaign sa mga nagkadaiyang tourist spot nga makita diha sa lungsod nga way pagpihig ug bulok politika.

Singil sa tubig gikahibudngan
Hulyo 20, 2008

Kahinumduman nga ang sistima sa panubig sa lungsod sa Anda gipaningkamutan kini sa LGU nga mapalambo aron makahatag kini sa tukmang serbisyo ngadto sa katawhan pinaagi sa paghulam og igong kantidad sa bangko nga gisuportaan sa usa ka resulosyon ug giuyonan sa mga kanhi sakop sa konseho.

Ang maong resolusyon naghatag og katungod sa LGU nga mohulam P22,000.00 pagpalambo sa sistima sa panubig.

Pito lamang ka mga barangay ang nakabinipisyo niini nga naglakip sa barangay Candabong, Virgen, Bacong, Poblacion Suba, Tawid ug Casica.

Gipahigayon ang paghulam kini dihang hapit na ang piniliay sa milabayng tuig sa Mayo 2007, ang pagdugang pagpanguha og trabahante pagpamutang sa linya sa tubig gihimo sa nagsugod ang pagpangampanya.

Daghang mitumaw nga pangutana, Moabot kaha og P22,000.00 ang pagtul-id sa sistema sa tubig sa Anda?

Asa ba diay kadtong unang ayuda nga gikan nasud sa Australya sa panahon nga gipahigayon ang “Filterization” sa tangke sa sistema sa tubig sa Anda?

Kinahanglan pa ba diay ang lungsod mohulam sa bangko aron maoy papas-anon ang katawhang Andahanon?

Ang katawhang Andahanon maoy nagpas-an karon sa utang ni Juan tungod kay ang kanhi minimum nga balayronon nga P25.00 niabot naman og P75.00.

Kadtong mobayad og sayo P65.00 lamang ang bayran. Maglisod pa man gani pagbayad og P25.00, unsa na kaha ning tag P75.00, nga unta di man kuryente ang gigamit sa sistema sa panubig sa lungsod?

Hangtod karon wa jod ipakita sa publiko ang unsa may mga nagasto sa P22,000.00.

Ang katawhan sa lungsod sa Anda ilabina gikan sa pito ka barangay nga apektado sa sistema karon sa panubig adunay dakong pagmulo kon asa ra ang gisaad sa lungsod?

Nganong mi-abot man sa tag linibo na ang balayronon sa Tubig? Di ba kaha kini paagi nga giingon niini aron makabayad kita sa inters sa utang hulam sa Bangko?

O di ba kaha tungod sa gigamit nga lokal nga kwentador mao nga kusog ang pagbiyo sa meter sa tubig?

Busa atong awhagon si Mayor Paulino Amper nga unta mapangitaan kini og paaagi kay sa magpasa-pasa kamo ug ipasangil ang mga kalapasan ngadto sa kontraktor ug uban pa.
 

Asyoso ra ta
Mayo 11, 2008

Ang nasod sa Taiwan gamay ra kaayo kon itandi sa atong nasod ug sa uban pa. Apan, bisan usa ka gamayng nasod ang Taiwan, gibantog kini nga maoy usa
sa mga nasod nga nag-unang importer sa bugas humay, tungod kay kugihan ang katawhan didtong nasora, mga di asyoso ug di mga garboso ang kinaiya sa katawhan kompara kanatong mga Pilipino.

Kadaghanan kanato, gusto og sayon nga matang sa trabaho. Kanang gitawag og white collar job, gani atong namatikdan ilabi na kadtong anaa sa mga dagkong buhatan, pribado man o publiko, nabatasan kanunay ang pagmanikyor sa ilang mga kuko sa kamot ug tiil aron ipakita ug ipasigarbo kanunay ang kalimpyo niini.

Ingon niini kitang mga Pilipino, apan ang mga Taiwanese lahi, tungod kay ang ilang gipakadak-an didto mao ang dugang produksyon sa pagkaon pinaagi sa pagtingob sa igong oras sa pagpananom og humay.

Ang ilang kasundalohan wala kanunay sa ilang mga kampo ug barracks. Hinuon, aduna na kiniy mga tagsa-tagsa ka station bill sa panahon madungog ang ogong sa siren sa unsa mang matang sa panghitabo.

Ang kasundalohan sa Taiwan, kadaghanan atua sa kaumahan ug nagpahigayon kini sa pagpanom inabagan sa kababayen-an.

Apan sa panahon nga makadungog kini sa ogong sa siren, ang mga sundalo, bombero, o kawani mag-iyahay kinig tuod sa tagsa tagsa niining mga gisangon ngadto sa ilang station bill.

Sukwahi kanatong mga Pilipino. Ang atong kasundalohan ug kapolisan ilabi na kon hapsay o way mga kaaway nga giatubang, puwera sa mga nagtinarong, anaa kanunay sulod sa kampo o barracks, nagpahigayon sa pagduwa og baraha.

Ang uban, mga protektor sa unsang matang sa illegal nga sugal. Ang uban atua sa ilang ikaduha o ikatulong kulasisi, nagpabugnaw ug nagpa-oraray.

Ang atong mga kawani nga anaa sa mga buhatang pribado o publiko man, luho kaayo ug di-korbata pa nga anaa sa mga mabugnawng lawak opisina, diin makakita na gani og mga ngilong mananap sama sa mga tiki, tuko, ok-ok ug uban pa ilabi na ang atong kababayen-ang kawani dayon kining singgit sa kangilo ug kahadlok.

Unsa na kaha kon alimatok na ang makita ug makasugamak kini diha sa kabaskan?

Paskang asyosoha ra ta! Maayo pang bungi kay maantigo pang moaghat nato pag-ingon: Mananom kita kay iyawat ug madam-ag aduna kitay mamumo.
 

Kawat didto, kawat diri
Mayo 4, 2008

Kahinumdoman niadtong gilampaso ug gikuso-kuso pag-ayo kita sa bagyong Nitang ug Ruping, nagbaha ang mga de-latang imported ug uban pang ayuda
ngadto unta sa mga biktima sa maong katalagman, gikan pa sa gawas sa nasod.

Apan pag-abot sa mga dapit nga naigo sa maong katalagman, buwad, noodles ug tinapa nalang ang gipanghatag sa mga biktima.

Ambot ba kon kanus-a ta mausab! Pagkabilyako gyod tang mga Pilipino. Way kahadlok sa Ginoo.

Hinuon, nag-ingon man sa Balaang Kasulatan: Maayo pay kitay tikasan ug limbongan kay sa kitay manikas ug manglimbong.

Karon nasab naproblema ang mga tinugyanan sa buhatan sa NFA kay ang mga sinakong bugas sa humay nga gikan sa NFA nga gi-apod-apod ngadto sa mga gitugyanang mga lisensiyadong NFA retailer gipang ismoko ug gisagol sa mga mahalong komersiyal nga bugas, aron makabitad og dakong ginansiya.

Pastilan! Wa na gyoy tarong ning kalibotan. Maihap nalang siguro. Kamong mapahimuslanong negosyante, hinumdomi baya ang Ginoo nag-ingon: Ayaw higugmaa ang salapi; igo na ang anaa kaninyo kay dili ko kamo talikdan ni biyaan.

Basin makaingon mo mga mapahimuslanong negosyante nga panahon na karon sa alisto.

Dinhi ra kana sa kalibotan. Hinumdomi duna pay laing kalibotan ang gitagana ug naghulat kanato.

Samtang sa laing bahin, daghan gihapon ang naglinyang mga kabos nga katawhan nga gikan pa sa mga lagyong kabarangayan aron lang makapahimulos sa baratong bugas nga gikan sa NFA, nga matagamtam lang matag tabo kon market day.

Mao kini namatikdan sa mga lungsoranong Andahanon. Ang ubang katawhang Andahanon manguli nalang nga way dalang bugas nga NFA, tungod sa kakulang sa sinakong bugas sa NFA nga gipang-apod-apod lang matag adlawng Martes, atol sa tabo.

Kadaghanan sa katawhanang kabos nga Andahanon nga naglinya nga wa na kahatagi sa pipila ka kilong bugas sa NFA.

Mapugos nalang pagpalit sa mura-mura gamayng tinagoang kwarta ngadto sa mga mahalong bugas aron lang kapugngan ang kagutom.

Tungod sa maong sitwasyon, giawhag ug gihangyo ang buhatan sa NFA Tagbilaran paghatag og dugang alokasyon sa sinakong bugas sa NFA ngadto sa maong gitugyanan sa lungsod sa Anda sa pag-apod-apod, aron sa ingon dili mouling luhaan ang mga kabos nga nagatuong makapahimulos.

Gikan sa taas nga paglinya niini, angayan siguro nga himuon ang pag-apod-apod sa bugas NFA kaduha-on sulod sa matag usa ka semana, dili lang himuon sa matag adlaw sa tabo.
 

Pagkalawsi way pagtagad
Abril 20, 2008

Kahinumdoman niadtong milaby’ng Huwebes Santo, adunay usa ka Diving Boat ang kalit mitikla-ob ug nakulob uban sa 11 ka mga langyaw’ng pasahero lakip na niini ang mga Pilipinong tripolante didto dapit sa lawod sa kadagatan sa barangay Virgen, Anda, Bohol.

Ang maong diving boat gikan pa sa isla sa Leyte ug paingon unta kini ngadto sa isla sa Pamilacan, aron unta mopahigayon kini sa ilang pagsud-ong sa kanindot sa maong dapit, apan walay swerte kay nalunod.

Ang subo lang palandungon kay niadtong hitaboa ang Diving Boat lang sa Flower Beach and Diving Resort ang unang nakaresponde gilayon ug nakapahigayon og pag-rescue sa mga langyaw’ng sakay niini ug dayon gi-atiman sa tagdumala sa maong beach resort nga gipanag-iya ni barangay kapitana Flor Garcia, inay unta kini trabaho man sa taga Phil. Coast Guard ug sa LGU Anda.

Pagkakulang pa gayod kita sa kagamitang pang-rescue nga unta nia naman unta kita karon sa pagka-high tech.

Ang pagluwas nga gihimo sa maong diving boat sa kalawran sa lungsod sa Anda, maoy usa ka dakong hagit ug angayan kini panaminan sa kagamhanang probinsiyal ug ingon man labaw sa tanan ngadto na sa LGU Anda, tungod kay katungdanan ug kaaakuhan usab kini sa namunoang lokal nga kagamhanan sa pagtunol sa hinanaling pagtagad sa unsa mang matang sa panghitabo ilabi na kon anaa sa kakuyaw.

Apan, ambot ba, bisan pa tuod tugtan ta nga nasayod sa hingpit ang LGU Anda sa maong panghitabo, apan kawang lang gihapon tungod kay ang LGU Anda, way mga sakyanang pang emerhensiya ug labaw sa tanan wala usay sakyanang pang-rescue ug pagpatrolya sa kadagatan.

Angayan unta kini hatagan sa igong pagtagad sa lokal nga kagamhanang probinsiya ubos sa pangpanguna ni Gov. Erico Aumentado, kay ubos man kining mga mayor sa iyang superbisyon.

Nga unta awhagan ug hatagan sa tukmang pag-pressure ang maong namunoan sa lungsod sa Anda sa pagbaton og sakyanan pang emerhensiya, aron kini maoy magamit sa unsa mang mga panghitabo, labi pa kay ang lungsod karon sa Anda, usa na karon sa giila nga tourist destination.

Sa kada tuig, ang LGU Anda nag-gahin kini sa igong pundo alang sa nagkalain-laing mga programa. Gani atong nasayran ug atong nakita sa gahin ning tuiga, ang peace and order gigahinan kini sa kantidad nga P1.6 milyon ka pesos.

Samtang ang intelligence fund mokabat sa kapin sa tunga sa milyon ka pesos. Kining maong funding gahin gikan kini sa buhis sa katawhan.

Apan ang pangutana: “Nganong di man makapalit og sakyanang pang emerhensiya ang LGU Anda? Ngano man lagi kon luho na gani nga sakyanang ISUZU Crosswind nga gigamit na kanunay karon ug personal maka-provide man pagpalit ang LGU Anda? Unsa god ni?”

Busa kamong mga sakop sa SB sa lungsod sa Anda ayaw mo pagpakabungol ug pagpakabota. Tan-awa kuno og unsay problema sa palibot.

Ayaw ninyo og pasagdi sila si Kagawad Teting Tinio ug Kagawad Oting Makinano nga kanunay’ng nagtuki niini.
 

Halu JBBN. I wnt 2 gr8 ol da s2dnt in SBNHS spcialy IV-New2n. 2 Wena, Flor, Erlnda, Coray ug ne Hangaw2x. Tankz more pwer. –frm Anamae 2-Soy. 0909814…

JBBN, owning gr8 q xa mmbr xa BCF ug HCFN clan, bz jud mo mu mga toogs ug bagz esp gr8ngs xa mga cmenarian ja xa Tlo2 ug n Narl2 dha xa Crmen. Hoy, pgbnutan na, gara rka kaau. Enx po, Gdblez, & mre power. –frm Pig Pie. 0909814…

Gd eve JBBN ngau ko ka txtm8 kana boy iya age 24 up. 09186035989

Hlo kya JBBN pwd mangayo k og k txtm8 knang grl unya boutan iyang ega 25 pataas. Im J-R frm Crmen Bohol. 09098552750