Suspetsado sa pagsunog sa balay, gisikop
Nobyembre 23, 2008

ANTEQUERA – Gisikop ug gipaslak sa selda ang suspetsado sa pagsunog sa usa ka panimalay didto sa Barangay Canla-as kaniadtong Myerkules (Nob. 20).

Ang suspetsado nailhan nga usa ka Rolando Ballestero, 33-anyos, minyo, ug mulupyo sa maong barangay.

Si Ballestero mao ang caretaker kon tagbantay sa maong balay nga gipanag-iyahan sa usa ka Arlene Dumadag.

Gibana-bana nga P100,000 ang kantyidad sa damyos sa pagsunog. Sa imbestigasyon sa kapolisan, ang suspetsado aduna kunoy diperensya sa pang-isip.

Matud pa, ang mga silingan buot unta motabang pagpawong sa sunog apan wala kini sila makaduol gumikan kay si Ballestero nagwarawara og lagaraw.

Bisan pa sa kahimtang ni Ballestero, magpadayon gihapon pagsang-at og kiha ang tag-iya sa balay nga si Dumadag. -dM

3 ka mga batan-on nahilambigit sa kasong rape
Ni: Boy Luzon
Mayo 18, 2008

TULO ka mga batan-on ang gisikop sa kapolisan sa lungsod sa Antequera nga nahilambigit sa kasong rape.

Ang biktima usa ka 16 anyos, taga dakbayan sa Tagbilaran. Ang mga suspetado nailhan sa ilang mga pangalan Jomar Celonia, 21, ulitawo, Gilbert Laniba, 21, minyo, ug usa ka Michael, 16, ulitawo, pulos mga molupyo sa Barangay Genomoan, Loon.

Nahitabo ang maong insidente niadtong abril 30, 2008 alas 10:00 ang takna sa gabii didto sa mag-aso falls sa lungsod sa Antequera, ang nga suspetado gisikop sa kapolisan niadtong mayo 5, 2008 alas 6:00 ang takna sa gabii didto dapit sa tindahan nga ginganlan og Simio, utlanan sa Barangay Canmaag ug Genomoan

Sa interbyu nga gihimo sa JBBN ngadto ni Michael, manag-uyab sila sa biktima, ug pormal nga iyang gisanghiran ang ginikanan sa babaye nga manoroy sila, uban ang duha ka mga batan-on nga ka barkada ni Michael.

Sakay sila sa usa ka motorsiklo ug didto patunong sa natumbok nga falls, didto makuha ang pagkaputli sa biktima, ug milampos ang dautang laraw sa mga batan-on, pagkakaron si michael anaa sa kustodya sa MSWD sa lungsod sa Loon, samtang ang duruha, anaa nabilanggo sa Antequera police station.

Tukmang sumbong ang gipasaka batok kanila.