 |
|
BARANGAYS Bilangbilangan Dako Bilangbilangan Diot Hingotanan East Hingotanan West Liberty Malingin Mandawa Maomawan Nueva Esperanza Nueva Estrella Pinamgo Poblacion (Bien Unido Proper) Puerto San Pedro Sagasa |
|
BALITANG LOKAL (BIEN-UNIDO) Suspek sa pagpatay sa Barangay Kagawad sa Bien-Unido nakigpinusilay sa NBIABC President nakuhaan og mga armas, alegasyon nga barangan gihimakak Ni: Edward Guyano Nobyembre 2, 2008 BIEN-UNIDO - Nakigpinusilay sa mga ahente sa National Bureau of Investigation (NBI) ang presidente sa Association of Barangay Counsel (ABC) nga kasamtang ex-officio member sa Sangguniang Bayan sa lungsod sa Bien Unido, Bohol dihang gisilbihag duha ka mga search warrant tungod sa iyang kalambigitan sa pagpatay sa iyang barangay konsehal ug paghupot ug mga armas. Naigo sa liog si Bien Unido ABC President ug Nueva Esperanza Barangay Kapitan Regalado Bonado human siya unang mipabuto atol sa operasyon nga gipahigayon sa mga ahente sa NBI alas 4:30 sa buntag kaniadtong Myerkules Oktubre 29 ug anaa karon sa Governor Celestino Gallares Memorial Hospital alang sa iyang pagpatambal. Nakuhaan si Bonado lakip ang iyang amahan nga si Roberto og lima ka armas dihang gihimo sa NBI ang ronda. Basi sa tinubdan nakuhaan ug armas ingon man kahimanan sa pagpamarang nga naglakip sa duha ka mga ulo sa kalabera ug monyeka ug mga lista sa mga tawo nga giingong barangon. Si NBI 7 Regional Director Medardo de Lemos namahayag nga nakadawat silag reklamo gikan kang Bien Unido Mayor Niño Boniel sa mga dili maayong gihimo sa mga Bonado sa ilang lungsod. Matud ni de Lemos nga ang kapitan ug ang iyang amahan gereklamo nga nagpakita sa publiko nga magdala og armas. Gilambigit usab sila sa kamatayon ni Nueva Esperanza Barangay konsehal Rito Boniel. Si Boniel gipatay niadtong milabayng buwan ug mipadangat ug reklamo ang iyang asawa ngadto sa NBI. Matud pa ni de Lemos mikuha sila og certificate of Fire Arms and Explosives Security Agency and Guard Supervisory Section (FESAGGS) kon ang mga Bonado may lisensya ba sa paghupot og mga armas apan wala mahimutang sa listahan sa ahensya nga makahupot silag armas. Kabahin sa kalambigitan nila sa pagpatay, ang NBI mikuha usab og search warrant sa korte didto sa Sugbo hinongdan nga duha ka search warrant ang ilang gidala. Nakuha sa maong raid ang usa ka improvised shotgun, duha ka mga .45 kaliber ug duha ka .38 nga rebolber. Ang usa ka .38 nakit-an nga gilubong sa yuta samtang ang usa gikan ni Roberto. Dihang gihinabi ning tigbalita mismo si Bonado, iyang gipanghimakak ang maong alegasyon, hinuon iyang giangkon nga nakuhaan siyag armas apan tayaon kini, sa una aduna kini lisensya apan karon wala ma-renew. Dugang pa ni Kapitan Bonado nga wala siya magpahigayon og pagpamarang sumala sa migawas sa mga balita. Iyang gipatin-aw nga wala siyay kasayoran sa ilang mga alegasyon gani bag-o palang silang nag sesyon. Matud pa niya dili siya motuo ug barang labaw sa tanan edukado siya. Sa pagkutlo ning balita ang suspetsado kasamtangan nga nagpaalim sa iyang samad pinusilan. Pag-culture sa lambay gitun-an Ni: Rey Dalay Oktobre 5, 2008 BIEN-UNIDO - Padayon karon nga gipahigayon ang pagtuon kalabot sa pag-culture sa lambay diha sa mga fishpond nunot ning nagkanihit karon nga suplay sa lambay ug aron paghatag og dugang panginabuhian sa katawhan nga nagsalig sa ilang panginabuhi diha sa dagat. Kini maoy gibutyag ni Kag. Rogelio "Dodong" Villarias, sakop sa Sangguniang Bayan sa lungsod sa Bien-Unido, niadtong Huwebes dihang gikahinabi ning tigbalita. Gibutyag ni Kag. Dodong nga kasamtangan adunay duha ka processing plant sa meat crab nga i-export, ang lungsod sa Bien-Unido. Ang usa ka planta anaa mahimutang sa islang barangay sa Pinamgo samtang ang usa anaa sa mainland barangay sa Puerto San Pedro. Dugang gibutyag ni Kag. Dodong nga 200-400 kilo matag adlaw ang makuha nga lambay diha sa kadagatan, diin gikataho nga pagkakaron nagnihit na ang suplay sa lambay ug nimahal na usab ang presyo. Gibana-banang tungod sa pagnihit sa suplay sa lambay, gikan sa P100-P150 nga kilo kanhi sa lambay mosaka kini ngadto sa P200-250 ang matag kilo. Ang pag-harvest sa lambay daghan kining mausik tungod kay ang mga mananagat dili man magpili kon gagmay ba o dagko ang ilang makuha. Si G. Gualberto Boniel, magtutudlo sa CPG High School nga anaa mahimutang sa barangay Puerto San Pedro maoy gitahasan karon ni Kag. Dodong Villarias nga mohimo sa mga pagtuon kon unsaon pag-culture sa lambay ug ipahimutang diha sa fish pond. Ang maong konsepto nakuha diin ang alimango ug isda mahimong buhion diha sa mga fish pond. Kon molampos ang maong pagtuon, hayan modako ang kita sa katawhan diha sa lungsod sa Bien-Unido. Gibutyag ni Villarias nga gisulayan ni Boniel pag-culture ang mga lambay, maoy gigamit niini kadtong mga usik na diin dili kini mabaligya sa merkado. Sigun gihimong inisyal nga pagtuon, ang mga lambay nga gibuhi sulod sa fish pond midako kini pag-abot sa duha ka buwan, ang pito ka buok lambay, moabot kini og usa ka kilo. Ang deperensya lang nga namatikdan sa maong pagtuon kay adunay baho sa unod sa maong lambay. Gidugang ni Villarias nga wala usab mohunong si G. Boniel aron dugangan pa ang maong mga pagtuon kon unsaon nga mawagtang ang baho sa lapok diha sa unod sa lambay. Nasuta usab ni G. Boniel nga namihod ang lambay nga iyang gibuhi sa fish pond. "Sa ato pa, mahimo gyod diay nga i-culture ang lambay," pamahayag ni Villarias. Ang mga usik nga lambay ibaligya lamang kini og P20 ngadto sa P30 ang kilo ug aduna kini sulod nga 100 ngadto sa 150 ka lambay matag kilo. Sa bana-bana ni Kag. Dodong Villarias mokita og usa ka libo kapin ang usa ka kilo nga nga pinalit nga mga usik sa panahon nga kini modagko na tungod kay pito lamang ka buok ang masulod sa usa ka kilo. Kon molampos kining maong pagtuon, hingusgan unya ang pagpadaghan sa inland fishing aron kaibsan ang kanihit sa panginabuhi diha sa lungsod. Ang Bien-Unido adunay mga basakan apan wala kini irigasyon hinungdan nga ang katawhan nagsalig sa ilang panginabuhi diha sa dagat.
Tuba-tuba dili lamang alternatibo nga bio-fuel, pagpugong usab
sa tubig Atol sa gipahigayon nga Annual Investment Plan nga gipasiugda sa DepEd dili pa lang dugay, diin si Kag. Dodong Villarias maoy usa sa mitambong. Si Kag. Villarias nagkanayon nga atol iyang nasuta nga kusog ang tubig sa lungsod pero nihinay kini kay daghan na ang nanimuyo. “Buot sa lungsod nga mo-loan sa bangko alang sa dugang waterworks system, apan atong gilantaw ang capacity to pay sa lungsod ug component niini mao ang reforestation,” matod pa niya. Gisugyot ni Kag. Dodong ngadto kang Mayor Niño Rey Boniel nga magpalit og tulo ka ektarya nga luna sa yuta ang lungsod ug maoy tamnan og kahoy. Kay kon walay mga tanom nga kahoy, mawala gayod ang tubig. “Gani sa pagkakaron, gamay na lang ang tubig nga mainom tungod kay misagol na man ang tubig parat sa mga water basin,” dugang pamahayag ni Kag. Villarias. Gibutyag usab ni Kag. Dodong nga iyang nakahinabi si Datu Berting Datahan, usa ka pangulo sa indigenous people, kinsa mibutyag ngadto kaniya nga ang biofuel law nagkanayon nga matag tuig konhuran og 5% ang pag-angkat og lana gikan sa gawas sa nasod. Si Kag. Villarias nagka-nayon nga ang tuba-tuba usa ka alternatibo nga kakuhaan sa biofuel, gawas sa biofuel mahimo kining source sa tubig, tungod kay dili kini mosupsop, igo lamang kining magpugong sa tubig. Pagkakaron buot ni Kag. Villarias nga isugyot ngadto sa Sangguniang Bayan nga magpanday og ordinansa nga imbes kahoy ang itanom tuba-tuba maoy itanom kay gawas nga makakwarta makatabang usab kini sa problema sa panubig. “Samtang makakwarta dili mapuo ang kahoy kay bunga man lamang sa tuba-tuba ang kuhaon,” matod pa niya. Ang maong ordinansa maglakip sa mga tinun-an sa elementarya nga magtanom og kahoy atol sa bulan sa Septyembre ug Oktubre diin mobunok ang ulan ning panahona. “Kadtong mga kahoy nga gitanom, kinahanglan atimanon gayod aron mabuhi, kon mamatay kinahanglan kining pulihan,” hinapos nga pamahayag ni Kag. Dodong Villarias. Moral recovery program ipahigayon Ni: Rey Dalay Setyembre 28, 2008 BIEN-UNIDO - Nagpadayon karon ang moral recovery program nga gipasiugdahan sa mga kadagkoan sa Couples for Christ sa mga kalungsoran nga nagtumong dili lamang sa mga hamtong nga minyo ug wala pa maminyo lakip na usab ang kabatan-onan aron mahilayo sila sa drugas ug masibot diha sa pagpangalagad sa Ginoo. Kini maoy gibutyag ni Kag. Dodong Villarias kinsa mao usab ang sector head sa couples for Christ sa ikaduhang distrito. Sa Oktubre 3, ipahigayon ang Youth Camp sa mga kabataan didto sa lungsod sa Pitogo sa tuyo ug tumong nga mahilayo ang mga kabataan sa drugas ug ingon man masibot diha sa pagpangalagad sa Ginoo, diin gibana-banang mokabat ngadto sa 300 ka mga kabatan-onan ang motambong niini. Karong Oktubre 10 didto sa Comambogan High School laing 300 ka mga kabatan-onan ang moapil sa ipahigayon nga Youth Camp sa maong tulunghaan. Sa Petsa 17 laing Youth Camp nga ipahigayon didto sa Bien Unido Academy sa tuyo ug tumong gihapon nga mahilayo ang mga kabatan-onan sa drugas ug masibot diha sa pagpangalagad sa Ginoo. Sa lungsod sa Talibon adunay gipahigayon nga Christian life program alang sa mga hamtong ug mga magtiayon na pinangulohan sa couples for Christ ug ipahigayon diha sa barangay hall sa Poblacion. Sa Pitogo adunay ipahigayon nga susamang seminar didto sa barangay Aguining, sugdan kini sa kataposang semana sa bulan sa Oktubre. Si Kag. Villarias mibutyag nga agresibo gayod siya sa pagpahigayon og moral recovery program dili lamang sa mga hamtong nga magtiayon kon dili lakip na usab sa mga kabatan-onan. Sa Talibon adunay gi-install nga singles for Christ coordinator sa mga hamtong na nga wala pa maminyo diin ang midawat niini mao si Dr. Mike Jayoma surgeon sa Provincial Hospital nga nahimutang sa Talibon. Gikalipay og dako ni Villarias nga adunay maggiya sa mga hamtong nga wala pa maminyo aron mahiduol diha sa Ginoo. Sa Bien Unido bag-o lang midawat si Dads Jimenez ug Beth Jimenez isip youth coordinator sa lungsod nga nagdala sa mga lungsod sa Bien Unido, Trinidad ug San Miguel. Bisan pa man niini, gitataw ni Villarias nga wala gayod niini kalimti ang kaakuhan sa lungsod aron mabaton ang kahusay ug kalinaw labina ang paglambo sa lungsod nga maoy primerong gilantaw. Gani dili lamang kay ang kalamboan sa lungsod maoy gilantaw, lakip na niini ang Segundo distrito pinaagi sa pag-usab sa kaugalingon diha sa mga hamtong ug kabatan-onan. Hinungdan nga agresibo gayod si Villarias uban sa kapikas nga si Joselyn Villarias pinaagi sa pagpangusog alang sa moral recovery program dili lamang sa mga politiko lakip na sa mga yanong molupyo aron matagamtam unta ang kalamboan sa umaabot panahon. Gipanghinaot ni Villarias nga ang mga molupyo sa Segundo distrito mohatag unta og dakong pagtagad ug suporta sa gihimong kalihokan kay kini gitumong man alang sa kalamboan sa Segundo distrito ug dili lamang sa kaugalingon. Si Villarias nagkanayon nga dili mominus sa 10,000 ka pamilya ang aktibo alang sa kawsa pag-usab sa dagway sa kalibotan pinaagi sa mga tawo nga adunay kahadlok ug dakong pag-alagad ngadto sa Ginoo. Mga sakop sa RMG gihangyo nga mobantay sa lungsod Ni: Rey Dalay Setyembre 28, 2008 BIEN-UNIDO - Nunot ning sunod-sunod nga panghitabo sa pagpamusil patay nga naglambigit sa mga opisyal sa barangay diin wala pa kahatagi og sulbad sa kapolisan ang mga kaso, usa ka resolusyon ang giduso sa mga sakop sa Sangguniang Bayan sa Bien Unido nga naghangyo sa mga kadagkoan sa kapolisan nga hatagan sila og police personnel. Kining maong kasayuran gikan ni Kag. Rogelio "Dodong" Villarias, kinsa tsirman sa Committee on Security sa maong lungsod. Gibutyag ni Villarias nga niadtong kataposang semana sa Agosto, gipusil ang Barangay Kapitan sa Liberty nga si Rolando Morales, wala ra mamatay pero nilagbas ang bala nga miigo sa iyang lawas. Kaniadtong Septyembre 2, sa barangay Mandawa, gipusil ang usa ka Mariano Nuñez, patay dead on the spot, wala pay nakuhang kasayoran ang kapolisan sa motibo sa maong krimen, wala hibaw-i kon kinsa ang mamumuno. Lain na usab nga barangay opisyal ang gipusil, usa ka ret. Police officer, konsehal sa barangay Nueva Esperanza nga si Rito Boniel, dead on the spot, gipsuil kini pasado alas utso sa kagabhion, duol lamang sa iyang panimalay, ang mga mamumuno, wala gihapon mailhi hangtod karon. "Subo palandungon nga ang Bien Unido daw init sa mga mata sa katawhan, gani kon maghisgot og Bien Unido daw kuyawan ang mga tawo, daw gipakaingon nga isog ang mga tawo didtong dapita," matod pa niya. Gipatawag sa Sangguniang Bayan ang OIC Chief sa kapolisan sa lungsod nga si SPO4 Georgito Ilicano gumikan sa sunod-sunod nga kamatay nga nahitabo. Ang rason sa OIC Chief mao nga kulang sila sa gidaghanon sakapolisan kay 18 ra sila ka buok, ang uban nadestino sa mga isla, ang uban na-assign sa mayor, dili dayon sila maka-responde. Gibutyag usab ni Villarias nga iyang nakita nga dihay checkpoint nga gihimo ang kapolisan apan dili kaayo subsob, sa wala pa ang mga panghitabo diha na ang checkpoint, pero wala pa masulbad ang maong kaso, ang mamumuno wala pa hibaw-i hangtod karon. Sa tulo ka kaso, dili pa gyod maka-establisar og kompleto nga motibo ang kapolisan kon unsa ang hinungdan sa maong mga pagpatay. Ang Sanggunian sa Bien Unido miduso dayon og usa ka resolusyon address sa Regional PNP pinaagi sa Provincial PNP Director nga nag-awhag ug naghangyo sa kapolisan sa rehiyonal nga buhatan nga unta kapun-an ang mga polis sa Bien Unido. Usa sa gitumbok sa maong resolusyon nga gipangamahan ni Villarias nga hatagan ang lungsod og usa ka team sa Regional Mobile Police Group, nga permanente nga maghimo og detachment sa Nueva Esperanza ug Liberty diin anaa didto ang mga kaso sa pagpamatay. "Mao nga dunay daghang kaso sa pagpatay nga sukad pa sa niaging tuig ug hangtod karon wala pa gayod masulbad, dunay mga suspetsado apan wala pa madakpi ug wala pa mapasakai og tukmang sumbong sa husgado, sama sa pagpatay ni Mayong Auxilio, hangtod karon ang suspetsado wala pa gihapon madakpi," dugang pamayag ni Villarias. Dunay mga taho nga gipaabot sa mga barangay tanod sa Barangay Esperanza nga nakakita ug nakasinati sa maong mga tawo nga maglabay-labay panahon sa kagabhion ug magsul-ob og bonnet. Usa ka ordinansa nga giawhag ni ABC President Regalado Bunado nga tanang mga drayber sa motorsiklo nga mosuld sa lungsod kinahanglan dili magsul-ob og bonnet. Lain nga punto nga gihatagan og pagtagad ni Villarias mao usab ang pagtan-aw sa kahimtang sa kahusay ug kalinaw diin gipatawag ang hepe sa kapolisan nga tigumon ang tanang mga tanod sa matag barangay aron kahatagan og igong kasayoran ug pahimangno. "Gani adunay mga checkpoint nga gipahiluna sa matag barangay matag gabii, bisan pa man kon gidili nga mohimo og checkpoint ang mga barangay tanod, apan gihangyo ang mga polis nga pinaagi sa ilang pagtugot makahimo og checkpoint pinaagi sa superbisyon sa kapolisan," butyag pa niini. Laing lakang gihimo mao usab ang pagpangayo og dugang kapolisan sa buhatan sa provincial PNP. Si Villarias nagkanayon nga segun sa pakighinabi niya ngadto ni Mayor Niño Rey Boniel, ang maong mga polis nga idugang sa probinsya adto ipahiluna sa boundary sa Trinidad ug Bien Unido, nahimutang sa barangay Liberty diin butangan og buhatan alang sa mga polis ug magpahigayon og checkpoint sa matag gabii sa tuyo ug tumong nga matino ug mailhan ang mga tawo nga maglabay-labay panahon sa kagabhion nga wala mailhi. Gibutyag usab ni Villarias nga iyang gisugyot ngadto sa mayor nga ang mo-duty nga tanod sa boundary usa ka composite team diin ang matag barangay magpadala og usa ka barangay tanod nga moduty og motabang pagpahigayon og checkpoint aron pagtino sa mga tawo nga mogawas ug mosulod sa lungsod. Matod pa ni Villarias, "kon usa lang ka grupo ug gikan sa usa ka barangay, mahimo nga ang mga tawo gikan sa laing barangay wala makaila ang mga tanod." Dugang pamahayag ni Kag. Dodong Villarias nga iyang gihinabi ang mayor kalabot sa pagpadagan sa lungsod diin medyo istrikto gayod alang sa mga tawo nga mosulod gawas sa lungsod. "Gani nagkanayon ang mayor nga tinuod dunay balaod nga ang magmaneho og motorsiklo magsul-ob og helmet apan gitambag sa mayor nga kon mosulod sila sa Bien-Unido nga kon mosulod sila sa lungsod kinahanglan tangtangon ang helmet ug magpahinay pagpadagan aron makalikay sa disgrasya," panapos nga pamahayag ni Kag. Villarias. Mga GRO mahal og bayad Ni: Rey Dalay Setyembre 28, 2008 BIEN-UNIDO - Usa ka ordinansa ang gipanday sa Sangguniang Bayan ning lungsod nga magpahamtang og mahal nga balayronon ngadto sa mga babaye nga nagsilbi isip serbedora sa mga videoke bars sa lungsod nunot sa mga taho nga kadaghanan kanila mga minor de edad. Kini maoy gibutyag ni Kag. Rogelio “Dodong” Villarias sa dihang gikahinabi sa JBBN. Gawas sa pagpahamtang og curfew nga kutob lamang sa alas 10:00 sa gabii ang operasyon sa mga videoke bar dili gihapon kalikayan nga adunay manga-hubog ug mosangko sa panag-away. Hinungdan nga giduso ni Kag, Rogelio “Dodong” Villarias ang laing ordinansa nga kadtong mga babaye nga nagsilbi isip GRO mokuha gayod og working permit diha sa buhatan sa mayor. Ang maong lakang gibuhat human usa ka lalaki ang namatay dili pa lang dugay tungod sa rambol nga nagsugod sa usa ka videokehan sa lungsod kay nag-ilog sa GRO ug didto sa gawas sa Videokehan nagkarambola, gitabangan ang usa ka ginganlan og Panio Autentico, molupyo sa La Victoria, Trinidad, kinsa namatay kay gitabangan og bunal ug bato ang iyang ulo, hangtod karon ang mga suspetsado wala pa masikop kinsa midali pag-ipsot ug wala na hiabti sa kapolisan nga miresponde. “Alang sa pagmentinar sa kahusay ug kalinaw diha sa mga videokehan gipanday ang maong ordinansa, gani kasamtangan adunay curfew nga gipahamtang nga kutob lamang sa 10:00 sa gabii ang pag-operate niini, apan bisan pa niana daghan gihapon mga kasamok nga masinati tungod kay aduna man gyoy mangahubog sa maong negosyo,” dugang pamayag ni Kag. Villarias. Lain nga nakit-an nga anggulo nga ang mga babaye nga nagsilbi sa maong matang sa patigayon kasagaran mga minor de edad. “Medyo taas-taas ang gilatid nga bayronon sa pagsuta ug pagtino sa mga tawo nga dili angayan sa maong buhat,” butyag ni Kag. Villarias. “Kay gani matod pa sa mga taho nga midangat nga kadtong namatay nagkanayon nga dili niya ihatag ang babaye kay dako nga siya og gasto, nalantaw nato nga dako diay og sapi kining negosyoha sa mga babaye hinungdan nga taas-taas usab ang gipangayo nga working permit aron malikayan ang mga dili maayong panghitabo,” panapos nga pamahayag ni Kag. Villarias. Mga molupyo misupak sa bag-ong buwangan Ni: Rey Dalay Setyembre 28, 2008 BIEN-UNIDO - Ang mga molupyo sa Nueva Estrella ug Mandawa, ning lungsod misulat ngadto kang Mayor Rey Niño Boniel nga hugtanon silang misupak sa tukoron nga Bien Unido Cockpit Arena sa ilang dapit sa mga rason nga ang maong buwangan usa ka commercial business makahimo og kasaba ug makaguba sa kalinaw sa mga molupyo hinungdan nga usa kini ka nuisance, ang maong lugar duol sa kabalayan ug health center ug nakalapas sa gilatid sa balaod kalabot sa distansya, ang maong buwangan nasulod sa comprehensive land use sama sa residential ug agricultural areas, hinungdan nga sila naghangyo ngadto sa mayor nga dili hatagan og permit ang operator niini ug kon duna man gani edepisyo nga gitukod ipaguba kini kay wala kini permit, ug ipabalhin ngadto sa laing lugar. Si Kag. Dodong Villarias mibutyag nga dako ang iyang kahikurat isip tsirman sa ad hoc committee dihang nakadawat kini og reklamo sa mga residente batok sa usa ka buwangan nga tukoron unta sa Brgy. Puerto San Pedro apan gibalhin sa Brgy. Nueva Estrella. Ang bag-ong buwangan medyo adunay problema human kini wala makasunod sa gipangayong kondisyones sa lungsod. Ang daan nga buwangan gideklara nga nuisance sa lungsod ug gipasirad-an tungod kay gawas nga delikado sa mga tawo nga mosulod, nakalapas kini sa sanitation diin walay kasilyas, walay kural ug nangahugno na ang lingkoranan ingon man nakalapas sa balaod diin 300 metros gikan sa edepisyo sa gobyerno ug 500 metros gikan sa residential sites. Pinasikad sa usa ka resolusyon gideklara kini nga nuisance ug wala na hatagi og permit ang operator niini. Hinungdan nga usa ka ad hoc committee ang gimugna sa mayor aron pagsiguro nga ang motukod og bag-ong buwangan kinahanglan mahisubay sa gilatid sa balaod. Isip tsirman sa ad hoc committee, si Villarias mibutyag nga usa ka nag-inusarang bidder ang miduso sa ilang plano ngadto sa buhatan ni Villarias ug nihatag og goodwill fee nga kantidad og P150,000. Ang maong petisyon gipadangat sa mga nagpakabanang molupyo ngadto sa mayor, gilakip usab paghatag og kopya ang Provincial Planning and Development Office Comprehensive Land Use Atty. John Titus Vistal, Municipal Engineer, Municipal Planning Development Coor-dinator ug ni Villarias isip tsirman sa ad hoc committee for the new Bien Unido Cockpit Arena ug ingon man ang rehiyonal nga buhatan sa Commission on Human Rights. Ang komitiba sa ad hoc nga naglangkob sa MPDC ug Municipal Engineer ug tsirman sa Committee on Structure nga si Kag. Eduardo Gentapa, isip tsirman sa maong komitiba giseguro ni Villarias nga ang mga gilatid nga mga rekisitos alang sa bag-ong cockpit arena sundon gayod. Kon makita nga makalapas ang bidder sa maong mga rekisistos, dili gayod ihatag ang award ngadto sa bidder. Segun sa pagbisita ni Villarias sa maong dapit, iyang nakita nga duol gayod kini sa kabalayan, hinungdan nga aduna gayoy rason nga pugngan ang pag-award ngadto sa bidder ug kon dili man gani mapugngan dili ihatag ang award. Lone bidder ang operator sa buwangan, ug kay wala may laing niapil sa bidding, gipapatik usab sa mantalaan ang bidding aron pagsunod sa gilatid sa balaod. Nakalusot sila kay ang unang lugar didto sa Puerto San Pedro nisunod man sa mga rekisisto. Hangtod karon wala pa mapirmahi ang maong award, diha nay kasabotan sa ad hoc committee nga ihatag na ang award tungod kay nasunod na man unta ang rekisito, apan kalit lamang silang nibalhin og dapit nagpasabot nga dili ipadayon ang pag-award sa bidding. Hinuon gidugangan og rekisitos nga kinahanglan moduso ang bidder og final proposal of site development kay kon dili nila matino ang lugar nga asa sila magtukod, dili usab ihatag ang award ngadto sa bidder. Mga barong-barong sulod sa merkado ipaguba, pulihan og bag-o Ni: Rey Dalay Setyembre 28, 2008 BIEN-UNIDO - Karong bulan sa Oktubre, ang tanang mga barong-barong nga giatupan og nipa sulod sa merkado, pinasikad sa resolusyon nga gipangamahan ni Kag. Dodong Villarias alang sa pagpahapsay ug pagpanindot sa merkado, gidili na ang mga barong-barong nga ibutang og maninda diha sa merkado, aduna nay demolition order nga gipakanaog ang Mayor mahitungod sa pagpangguba niini. Giawhag kadtong mga tag-iya sa maong mga barong-barong sanglit sila man ang naninda sa maong dapit sila maoy prayoridad sa tukoron nga edepisyo nga mamahimong block tienda sa merkado apan dili mahimo nga magtukod sila sa ilang kabubut-on, nag-agad gihapon kini sa design nga gitugot sa lungsod, konkreto ug adunay specification sa building, class A classification, pareho og desinyo. Ang scheme sa pagtukod sa maong merkado ipaagi sa Build Operate Transfer (BOT) ang magpapatigayon maoy mopatukod sa maong edepisyo ug dili mobayad og abang sulod sa 20 ka tuig segun sa gipirmahan nga kasabotan sa mayor. Ang bayran lamang mao ang business permit. Human sa 20 ka tuig ang maong building i-turn-over ngadto sa lungsod ug ang lungsod na maoy manag-iya niini. Samtang sa laing bahin, ang atubangan sa fish port nga adunay tindahan sa mga isda, hutdon kini og konkreto sumpay sa merkado ug giplanohan nga maoy himoong terminal sa mga depasaheroan. Gibutyag ni Villarias nga ang St. Jude Transportation nga nagbiyahe tulo ka higayon sa usa ka adlaw, usa ka biyahe niini nga moabot og 9:00 sa buntag anha gayod mag-istambay sa merkado pinaagi usab sa usa ka resolosyon sa Sangguniang Bayan aron makahimo usab og panginabuhian sa mga habal-habal drayber. Kay kon maglibot-libot ang sakyanan, mohunong ang pagtuyok sa ekonomiya sa lungsod. Gibuytyag usab ni Villarias nga adunay mga tawo nga supak niini kay naapektahan apan iyang gipasabot nga kinahanglan kining buhaton aron alegre ang panginabuhian sa lungsod.
Kalsada gisugdan na pagsemento BIEN-UNIDO - Ang kalsada gikan sa Trinidad paingon sa Bien-Unido gisugdan pagtrabaho sa kontraktor niini aron pagsumpay sa 500 metros nga wala masemento, duna nay mga stock pile andam na pagtrabaho. Kini maoy gibutyag nga kalamboan ni Kag. Rogelio “Dodong” Villarias sa dihang gikahinabi ning tigbalita. “Kadtong nahuman na pagsemento gibutangan na usab og shouldering aron walay madisgrasya sa mga motorista,” matod pa niya. Ang pantalan sa merkado nga nagpabiling wala matagad sa nangaging katuigan ug wala makonktreto, karon nahuman na ang pagkonkreto niini. Gani adunay mga magpapatigayon nga mibutang og nindot nga mga restaurant. Gimugna ang usa ka edipisyo aron ikapahimutang ang nindot nga kan-anan. Nagpasalamat usab ang lungsod sa hinabang gikan ni Senador Rodulfo Biazon nga mihatag og igong pundo alang sa pagsemento sa merkado. “Kay ang merkado daw lugwayanan sa mga baka kay labong kaayo ang mga sagbot u gang palibot wala ma-ispalto hinungdan nga hitak kaayo. Aduna nay kwarta nga gigahin alang sa maong katuyoan,” dugang pa ni Kag. Dodong. “Gipahiluna usab gikan sa buhatan sa mayor mao ang pagbutang og tennis court ug basketball court sa merkado, medyo mahanaw na ang mga sagbot niini,” panapos nga pamahayag ni Kag. Dodong Villarias. Disaster management action planning seminar workshop gipahigayon Setyembre 14, 2008 BIEN-UNIDO - Ang bag-ong gimugna nga Municipal Disaster Coordinating Council ning lungsod mipahigayon og duha ka adlaw nga disaster management action planning seminar workshop niadtong Septyembre 4-5 didto sa municipal gymnasium. Kini maoy gipadangat nga mga kasayuran pinaagi ni Wilfredo E. Villamero, Commo&Info Svc, MDCC-Bien Unido. Ang maong kalihokan nagtumong pagmugna og mga pamaagi alang sa pagpangandam nga makunhuran ug unsaon pagtubag sa mga pangi-nahanglanon sa katawhan lakip na niini ang rehabilitasyon sa panahon nga moigo ang usa ka bagyo sa lungsod ug magdala kini og dakong kadaot sa mga molupyo. Ang maong seminar gipangunahan ni Hal. Mayor Niño Rey F. Boniel, MDCC Chairman ug FO3 Edilberto A. Nuera, BFP, municipal fire protection coordinator sa lungsod sa Bien Unido ug Trinidad ug ingon man usab bag-ong gitudlo sa mayor nga civil defense coordinator ug maoy magdumala sa MDCC. Ang lungsod miimbitar og mga mamumulong gikan sa provincial civil defense nga sila si Engr. Ver Neil Balaba, Civil Defense Officer, DND-OCD, Bohol; Lt Col Raul B. Mendez (PA Ret) Executive Officer, PDCC Bohol Provincial Warden; Mrs. Rita M. Requeron, PNRC administrator; Mrs. Merlinda Batoy, CSR-DMS-IHL PNRC; TSGT Fermin Baluran, CRT-Bohol, 3 Civil Relation Group, CRS AFP ug SFO1 Francisco M. Manilag gikan sa Bureau of Fire Protection (BFP). Ang mga misalmot sa maong seminar workshop naglangkob sa mga sakop sa Sangguniang Bayan, mga hepe sa mga buhatan, PNP, DepEd, mga representante sa pribadong tulunghaan, NGO’s, ug mga piniling regular nga empleyado sa LGU kinsa mipaubos sa usa ka lecture workshop ug group discussion. Ang lungsod sa Bien-Unido nga nahimutang sa norte nga bahin sa Bohol, dako og purohan nga maigo kini sa mga kalamidad sama sa bagyo hinungdan nga tukma gayod ang gipahigayon niini nga seminar alang sa mga pagpangandam. (RD) |