The JBBN Staff

Tubigon usa na ka 1st class nga lungsod
Desyembre 21, 2008

TUBIGON - UBOS sa pagdumala ni Mayor Luna Piezas, milukso ang lungsod sa Tubigon gikan sa 3rd classification ngadto sa usa ka first class town, kalamposan nga panagsa ra mahitabo diha sa kasaysayan sa lungsod.

Wala na karon mag-solo ang lungsod sa Talibon tungod kay gawas sa Tubigon nalakip na usab ang lungsod sa Ubay isip mga first class town dinhi sa Bohol.

Si Servanda Salomon, ang tigpamahandi sa lungsod nagkanayon nga mokita og ubos sa P44 million upat ngadto sa lima ka tuig kanhi ang lungsod, apan sulod sa tulo ka tuig daku gayod og kausaban tungod kay milukso ngadto sa P55 million ang kita sa lungsod.

Sigun sa talaan, ang Tubigon adunay average income nga P63.361 sa milabayng tulo ka tuig, hinungdan nga naangkon niini ang kinatas-ang posisyon.

Ning maong kalamboan, nakita sa mga magbubuhis nga ang aktibong liderato sa lungsod ug ang pagpalambo sa merkado sa lungsod maoy dakong instrumento sa pagsaka sa kita.

Samtang adunay mga molupyo sa Tubigon nagkanayon nga hayan pasakaan usab ang bayranan sa buhis aron magpabilin nga first class town, si Salomon nagkanayon nga gawas sa real property taxes, diin wala silay kontrol, pabilin gihapon ang municipal taxes, hangtod nga walay bag-ong ordinansa nga ipasar ang konseho.

Midugang si Salomon nga walay pagsaka sa local taxes, gawas sa real property tax, nga usbon matag tulo ka tuig.

Hinuon, siya midugang usab nga hayan sa tuig 2010 adunay kausaban sa municipal tax ordinances, kay mao man kini nakalatid sa local government code.

Ang dakong epekto niining classification mao ang pagsaka sa suholan sa mga empleyado, tungod kay magsunod na man kini sa first class bracket sa salary standardization.

Ang Bureau of Local Government and Finance (BLGF) sa memorandum of circular no 01-M (15)-08 pinitsahan Nobyembre 20, 2008 mimando sa re-classification sa mga lungsod sa Bohol, ug kini epektibo sukad pa Hulyo 29, 2008.

Sigun sa BLGF, ang class brackets gibase sa average annual income sulod sa tulo ka tuig.

Ang First class towns kinahanglan adunay average P55M o mas taas pa, 2nd class towns P45M-P54M average.

Third class towns P35M-P44M; fourth class: P25M-P34M; fifth class P15M-P24M ug sixth class towns ubos sa P15M. (rachiu/PIA/RD)

Gob mibasol sa DPWH tungod sa guba nga kalsada
Ni: Edward Guyano
Nobyembre 30, 2008

GUMIKAN sa pag-kaguba ug pagakahunlak sa kalsada nga nagdugtong sa Tubigon ug Catigbian gibasol ni Gobernador Erico B. Aumentado ang DPWH gumikan sa pagpasagad niini.

Atol sa iyang sinimanang report iyang gipresentar sa media ang iyang nadawat nga report tungod sa pagkaguba sa kalsada nga gitrbaho sa DPWH Department of Public Works and Highways.

Matud pa niya aduna usab siyay gikuptan nga mga ebidensya sama sa mga hulagway sa kahimtang sa maong kalsada nga matud pa nalusno kini ngadto sa basakan.

Subay niini si Aumentado miawhag sa DPWH, NEDA ug ingon man si Congressman Edgar M. Chatto nga magtambayayong aron nga masulbad ang maong suliran nga usa usab sa gimulo sa katawhan nga moagi sa maong dalan.

Lalake gi-dunggab, 7 ang samad, patay
Ni: Edward Guyano
Oktobre 26, 2008

TUBIGON - Usa ka lalake ang nakaangkon og pito ka samad dinunggaban hinungdan sa iyang ug nakaangkon sa hinanaling kamatayon human dunggaba kaniadtong petsa 21 sa kaadlawon.

Sumala sa blotter sa Tubigon PNP ang biktima gipaila nga usa ka Al Laurel hingkod ang panuigon ug nagpuyo sa Brgy. Pook Occidental sa maong lungsod samtang ang suspitsado gipaila nga usa ka Veolito Pagalan, 42, lumulupyo usab sa samang dapit.

Matud pa, sa sayong kaadlawon nangahubog ang biktima ug ang suspek ug sa ilang wala pagsinabtanay mikuhag kutsilyo ang suspik ug dayong dunggab sa biktima sa maka pito ka higayon sa nagkadaiyang parti sa lawas.

Ang suspek nasikop lang usab sa kapolisan ug anaa na karon sa karsil sa Tubigon PNP samtang nag atubang sa tukmang kaso.

Lupong Tagapamayapa, kampeyon sa Regional level search
Ni: Jingle L. Tripoli
Setyembre 28, 2008

TUBIGON - Nagmalampuson ang Barangay Pooc Oriental sa lungsod sa Tubigon human nga naangkon niini ang kadaugan sa Regional level isip most outstanding lupon para 1st to 3rd class municipality nga gipasiugdahan sa nasyonal nga buhatan sa DILG.

Gikonpirma ang maong kadaugan pinaagi ni DILG Regional Director Pedro A. Noval, Jr., sa iyang sulat ngadto ni MLGOO Ms. Sharon M. Marimon pinetsahan niadtong Septyembre 22, 2008.

Malipayon ang mga barangay opisyal sa dihang ilang nakuha ang maong taho gikan ni Ms. Marimon nga naghatag na sad og laing dungog sa ilang barangay ingon man sa lungsod ug tibuok probinsya sa Bohol.

Matod ni Kapitana Emma Delima Bangcoy nga ilang gipangandaman ang National level uban sa ilang abtik ug kugihan nga Barangay Secretary Ms. Lourdes O. Gulayan nga maoy nag-andam sa mga papeles nga gikinahanglan niini.

Kahinumduman nga si Ms. Gulayan nakaangkon og award isip Most Outstanding Barangay Secretary gikan sa DILG-Bohol ug ang Barangay Pooc Oriental maoy provincial winner.

Mapasalamaton ang konseho ug tibuok banay sa lupon sa Barangay Pooc Oriental ngadto ni Ms. Marimon tungod sa paningkamot niini nga maangkon sa maong barangay ang kadaugan ug ngadto usab sa mga evaluators nga niduaw kanila ug sa DILG-Bohol ug regional office.

Ang mga sakop sa lupon sa Barangay Pooc Oriental mao sila Mrs. Eleonor Corage, Ms. Corazon Bunac, Mrs. Corazon Jao, Mrs. Caridad Julogan, Ms. Erlinda Cabilan, Mrs. Wilhemia Cortes - pulos mga retiradong magtutudlo, Mr. Rodrigo Libante og Mr. Teofilo Nodado - mga retiradong seaman, Mr. Eugenio Lamanilao - negosyante, Mr. Eusebio Dalagan - retiradong Security guard, Mrs. Ma. Albe L. Tripoli - education graduate ug negosyante.

District meet, gipahigayon sa Tubigon
Ni: Jingle L. Tripoli
Setyembre 28, 2008

TUBIGON - Gipahigayon ang district meet ning lungsod didto sa Tubigon West Central Elementary School.

Tinambongan kini sa nagkalain-laing publiko nga tunghaan sa elementarya ug duha ka sekondarya, ang Tubigon East National High School nga nahimutang sa Barangay Cawayanan ug Tubigon West National High School sa Barangay Ilijan Norte.

Gisugdan ang maong kalihukan pinaagi sa hamubo nga programa isip pagbukas sa district meet nga tinambongan nila Mr. Simeon Ruloma – supervisor sa Tubigon West, Mrs. Erlinda Villame – supervisor sa Tubigon East, Mr. Felix Cosap – principal sa Tubigon West Central Elementary School, Dr. Marcelo Apsay, Kag. Arturo Yu – chairman sa komitiba sa edukasyon og sports, mga principal sa ubang tunghaan sa distrito inubanan sa ilang mga magtutudlo og atheleta.

Nagmalampuson ang maong kalihukan bisan pa man sa maot nga panahon tungod sa kusog nga hangin ug ulan.

Ang mga mananaug sa maong district meet maoy ipadala sa sub-congressional meet didto sa lungsod sa Loon.

Sa pagkakaron gibahin sa duha ka distrito ang lungsod sa Tubigon mao ang Tubigon East ug Tubigon West.

PNP-Tubigon, nagpahigayon og check- point
Ni: Jingle L. Tripoli
Setyembre 28, 2008

TUBIGON - Nagpahigayon og surpresang checkpoint ang kapolisan sa lungsod sa Tubigon kaniadtong Septyembre 23 adlawng Martes alang sa mga sakyanan nga walay permit ug mga motorista nga walay lisensya.

Ubay-ubay ang nasango sa dihang gipangayuan sila og permit sa ilang sakyanan ug lisensya sa ilang pagmaneho subay sa dalan paingon sa merkado publiko ug pantalan sa maong lungsod.

Gihimo ang maong kalihukan diha mismo atubangan sa balay-lungsod sa Tubigon nga gipangulohan sa ilang hepe ug mga kaubanan sa trabaho.

Samtang ang ubang kapolisan nag-atang sa eskina duol sa bangko sa PNB aron dili makaikyas ang mga motorista nga makasulod sa maong dalan.

Nagmalampuson ang maong operasyon nga gipa-siugdahan sa PNP-Tubigon ug natapos sa may alas singko sa hapon.

Holy Cross Academy-Tubigon nagsaulog sa ilang Pyesta, Intramurals
Ni: Jingle L. Tripoli
Setyembre 21, 2008

TUBIGON - Nagsaulog ang Holy Cross Academy–Tubigon sa ilang tinuig nga kapistahan ug intramurals niadtong niaging semana.

Natunong sa adlawng domingo ang kapistahan sa triumph of the Holy Cross mao nga gisibog kini sa adlawng Lunes ug hangtod sa Miyerkules mao ang intramurals.

Gisugdan ang maong kalihukan pinaagi sa usa ka santos nga misa nga giselebrar ni Padre Bing Husain, direktor sa maong tunghaan, didto sa Parokya ni San Isidro Labrador.

Gisunod ang parade sa nagkalain-laing team ug dayon ang opening program didto sa HCA - Christo Rey ground ug sinaksihan sa bagang duot sa katawhan nga nagpaabot sa search for Mr. & Ms. HCA sports icon 2008 ug ang cheering competition.

Nigawas nga mananaug sila Danilo Encabo Jr. ug Claire Podador samtang ang Red team – St. Ignatius de Loyola sa cheering competition.

Gipahigayon usab ang feeding program alang sa kabus nga kabataan sa lungsod ug mga bata nga malnourished nga kabahin sa tinuig nga kalihukan sa maong tunghaan.

Sa adlawng Martes ug Miyerkules mao ang nagkadaiyang duwa sa paugnat sa kusog.

Mapasalamaton si Mrs. Delia F. Lasco, school principal, Padre Bing Husain, school director ug ang tibuok nga banay sa HCA tungod sa kalampusan sa maong kalihukan.

Bag-ong health center sa Pinayagan Norte gibuksan
Ni: Jingle L. Tripoli
Setyembre 21, 2008

TUBIGON - Gibuksan na ang bag-ong health center sa Brgy. Pinayagan Norte, ning lungsod niadtong nakalabayng semana.

Tinambongan kini ni Kongresista Edgar Chatto nga maoy niputol sa laso atol sa pagbukas.

Uban ni Kong. Chatto mao sila Atty. Tomas Abapo sa opisina ni Gov. Aumentado, Atty. Luna Piezas – Mayor sa Tubigon, ug mga barangay opisyales nga pinangulohan ni Kapitana Inday Ester Loresto.

Nisaksi usab sa maong kalihukan ang mga baryohanon nga malipayon sa pagbukas sa ilang bag-ong health center nga dugay na nila gipaabot.

Dakong tabang sa katawhan ang maong health center sa barangay tungod kay makakuha sila og libreng tambal kung dunay reseta gikan sa doctor para sa ilang mga sakit.

Gisugdan na ang libreng check-up pinaagi ni Dr. Alegarbes human kini gibuksan. Atol sa pagkutlo ning balita, mao usab ang pag-adto ni Kapitana Loresto sa Manila aron pagkuha sa dugang tambal alang sa barangay.

Turn-over ceremony sa mga libreng libro, malampuson
Ni: Jingle L. Tripoli
Setyembre 14, 2008

TUBIGON - Malampuson ang gipahigayon nga turn-over ceremony alang sa mga libreng libro nga gidonar gikan sa Nath Endowment ngadto sa DepEd–Tubigon.

Gipangulohan ni Mayor Luna Piezas ang maong kalihukan og uban ni kanhi board member Engr. Prasing Mascariñas, MLGOO Ms. Sharon Marimon og mga barangay opisyales samtang sa DepEd–Tubigon mao sila district supervisor Mr. Simeon Ruloma, school principal Mrs. Fe Politan og mga magtutudlo sa Pinayagan Norte Elementary School.

Gisunod usab ang pag-apod-apod ngadto sa kabataan ang mga libreng libro aron aduna silay matun-an sa ilang tagsa-tagsa ka panimalay.

Nikabat og 2,156 ka libro ang gihatag sa Pinayagan Norte Elem. School gikan sa Nath Endowment nga gipanag-iya ni Dr. Manoj og Ana Nath nga nagbasi sa Las Vegas, Nevada, USA.

Human sa maong ka-lihukan, mapasalamaton ang DepEd–Tubigon ngadto sa Nath Endowment sa ilang libro nga gidonar ngadto sa Pinayagan Norte Elementary School.

Kapitana Middlemist nanghatag og libreng school supplies sa mga bata
Ni: Jingle Tripoli
Setyembre 14, 2008

TUBIGON - Libreng school supplies ang gipanghatag ni Kapitana Aniceta B. Middlemist ngadto sa mga tinun-an sa Brgy. Talenceras.

Pipila ka mga kabataan ang nakadawat og nakapahemulos sa maong programa ni Kapitana Middlemist.

Daghan ang nalipay niini ilabina ang mga ginikanan nga maglisud sa pagpalit niini tungod sa ilang kahimtang kay unahon man ang bugas og sud-an ilabina nga nahimutang sila sa bukiran nga bahin sa lungsod sa Tubigon.

Gipanghatag ang mga lapis, papel, notebook, krayola og uban pa nga kagamitan sa pagtuon pinaagi sa mga magtutudlo sa Dep.Ed – Talenceras.

Matod ni Kapitana Middlemist nga nalipay pod siya sa dihang iyang nakita ang mga kabataan nga nalipay sa pagdawat niini.

Nagpasalamat ang mga ginikanan ngadto ni Kapitana Aniceta Middlemist tungod sa maayong programa nga iyang gihatag sa barangay.

Quezon Memorial Development Camp sa Tubigon Central Elem. Schl. malampuson
Ni: Jingle L. Tripoli
Setyembre 14, 2008

TUBIGON - Malampuson ang gipahigayon nga Quezon Memorial Development camp adlawng Biyernes og Sabado didto sa Tubigon Central Elementary School.

Tinambongan kini sa mga boys scout og girls scout sa kada year level sa maong tunghaan.

Gisugdan ang maong kalihukan pinaagi sa pagtawag sa kada troop og paghatag sa ilang sadya og makalingaw nga tubag pinaagi sa pagkanta og sayaw.

Nihatag sa iyang men-sahe si Mr. Rodulfo Estafia, principal sa Tubigon West High School og dayon si Kag. Arturo Yu nga maoy tsirman sa komitiba sa edukasyon og kasamtangan nga presidente sa federated PTCA sa Tubigon.

Pagkahuman sa opening program gisunod ang torch parade og camp fire nianang gabii.

Sa adlawng Sabado, gipahigayon ang GSP tuklas ng talino, BSP talent quest, scout advancement, nagkadaiyang dula og community services.

Sa pagtak-op sa maong kalihukan, dakong pasalamat ni Mr. Felix Cosap, principal sa Tubigon Central Elementary School, ngadto sa mga partisipante nga kabataan, magtutudlo, bisita og labaw sa tanan ngadto sa mga ginikanan nga nihatag og nipakita sa ilang dakong suporta ngadto sa ilang mga anak.

Gipahigayon ang awarding da adlawng Lunes human sa flag raising ceremony.

Libreng Libro sa Kabataan sa Barangay, nahiabot na
Ni: Jingle L. Tripoli
Setyembre 14, 2008

TUBIGON - Nahiabot na ang mga libro nga gikan sa Nath Endowment sa Amerika og ipang-apod-apod sa kabataan sa Brgy. Pinayagan Norte.

Matod ni Kapitana Inday Ester Loresto nga iya kining gitagbo didto sa Cebu lulan sa Superferry gikan sa Manila.

Ang instruksyon nga iyang nakuha nga ipang-apod-apod kini nga libre sa mga tinun-an sa maong barangay pinaagi sa Dep.Ed – Pinayagan Norte.

Dakong pasalamat ni Kapitana Loresto ngadto sa Nath Endowment nga ang iyang kabataan sa barangay makapa-hemulos sa maong libro.

Kahinumduman nga ang Nath Endowment gipanag-iya og gidumala sa magtiayong Dr. Manoj og Ana Nath.

Bag-ong covered bleacher sa Pinayagan Norte, napahimuslan sa katawhan
Ni: Jingle L. Tripoli
Setyembre 14, 2008

TUBIGON - Napahimuslan ang bag-ong covered bleacher sa Brgy. Pinayagan Norte ning lungsod sa Tubigon atol sa nakalabayng selebrasyon sa kapistahan sa barangay.

Malipayon ang mga baryohanon nga kini ilang nagamit atol sa mga nagkadaiyang aktibidades og kalingawan sa ilang barangay.

Dili na maputol ang ilang kalingawan kun adunay ulan o maot nga panahon kay may pasilonganan naman ang mga katawhan nga mosud-ong sa kalihukan.

Matod ni Kapitana Inday Ester Loresto nga iya gayud nga gipadali ang paghuman sa maong proyekto aron magamit sa iyang mga baryohanon.

Nalipay og dako si Kapitana Loresto nga adunay na siyay laing proyekto nga nahuman.

Mayor Luna Piezas misuporta sa Chocolate Hills
Ni: Jingle Tripoli
Setyembre 7, 2008

TUBIGON - Nipadayag sa iyang suporta si Tubigon Mayor Luna C. Piezas para sa Chocolate Hills alang sa New Seven Wonders of the World.

Matod ni Mr. Boy Delgado nga adunay mga sulat nga gipadala si Mayor Piezas nga naghangyo sa pagbotar sa Chocolate Hills sa internet sa www.new7wonders.com.

Gilauman sa mayor nga mahilakip ang Chocolate Hills sa maong listahan sa bag-ong pito ka atraksyon sa kalibutan kay makapahemulos man ang iyang lungsod pinaagi sa pantalan nga dinhi kasagaran moagi ang mga turista nga moduaw sa Chocolate Hills.

Ang lungsod sa Tubigon adunay lapad, hamu-gaway og busy nga pantalan sa probinsya nga halos kada oras adunay biyahe paingon sa Cebu og balik sa Bohol.

Strategic planning ug budgeting gipahigayon
Ni: Jingle Tripoli
Setyembre 7, 2008

TUBIGON - Mabungahon ang gipahigayon nga strategic planning og budgeting alang sa lungsod sa Tubigon didto sa Punta Bay, Maribojoc niadtong Agosto 26-28 ning tuiga.

Ang maong kalihukan tinambongan sa mayor sa lungsod, miyembro sa sangguniang bayan nga pinangulohan ni bise-mayor Fred Batausa, department heads og section heads sa kada depar-tamento nga pinangulohan ni Engr. Noel Mendaña, MPDC officer sa Tubigon.

Samtang gipahigayon usab ang Market Management Meeting niadtong Setyembre 4, adlawng Huwebes didto sa JJ’s Foodstream ning lungsod.

Tinambongan sa market administrator, vendors association, tricycle drivers association og PNP.

Gihisgutan mao ang dugang kalambuan sa merkado publiko sa maong lungsod og dugang kahapsay og kahenlo.

Nagpasalamat si MLGOO Ms. Sharon Marimon sa mga nitambong.

Bag-ong Ubojan bridge gisugdan sa pagtrabaho
Ni: Jingle L. Tripoli
Setyembre 7, 2008

TUBIGON - Gisugdan ang pagtrabaho sa karaang taytayan nga nahugmak sa nilabayng sobra napulo ka tuig na og nahamutang sa Brgy. Ubojan, Tubigon.

Matod ni Kapitan Ruel B. Alampayan nga gisugdan ang maong operasyon sa maong proyekto niadtong Agosto 25 ning tuiga.

Bag-o pa niana, gisubay kini sa nakadaug nga kontraktor nga mao ang VMM Construction nga nagbase sa Tacloban City ug girepresentahan ni Mrs. Mercado niadtong Agosto 9 og ilang gihatod ang kahimanan sa maong dapit niadtong Agosto 24.

Nibisita usab sa maong lugar si Kongresista Edgar M. Chatto ug Mayor Luna Piezas uban ni Kapitan Ruel Alampayan niadtong Agosto 20 aron pagsusi sa maong proyekto nga gipundohan og gipaluyohan sa nahauna.

Nibalor ang maong proyekto og P13 milyones ug may gitas-on nga sobra 20 metros. Gibana-bana nga ma-human ang maong proyekto sulod sa 477 ka adlaw o sobra sa usa ka tuig tungod sa kadako niini apan matod sa VMM Construction nga paningkamotan nila nga sulod sa unom ka bulan mahuman na ang sikwenta porsyento sa maong proyekto.

Natubag ang maong problema tungod sa paningkamot ni kanhi Brgy. Kag. Bernardo Cosap Sr. nga maoy nangunay sa paglihok sa papeles nga gikinahanglan niini uban ni kanhi Kapitan Toto Tirazona Sr. nga niserbisyo sa tulo ka termino sa maong barangay.

Matod sa tagi-baryo nga dugay na nila kini gipaabot og panahon pa ni kanhi Kapitan Constancio Coscos ang maong problema.

Sa dihang nahinabi si Kap. Ruel Alampayan matod pa niya nga dako ang iyang kalipay nga napadayon na ang pagtrabaho sa maong taytayan kay importante kaayo sa iyang tagi-baryo para sa ilang public safety og sa mga gagmayng negosyante sa maong barangay nga maghatod sa ilang produkto ngadto sa lungsod.

Inter-Collegiate Goodwill Games gipahigayon sa Tubigon
Ni: Jingle L. Tripoli
Setyembre 7, 2008

TUBIGON - Gipahigayon ang Bohol NorthWestern Colleges Inter-Collegiate Goodwill games didto sa Mater Dei College sa lungsod sa Tubigon niadtong Agosto 29, 2008.

Ang maong kalihukan gipartisipahan sa upat ka dagkong tunghaan sama sa host school karong tuiga ang Mater Dei College-Tubigon, CVSCAFT Clarin, CVSCAFT Calape ug ang bag-ong miyembro nga mao ang Bohol Northwestern Colleges sa lungsod sa Catigbian.

Gisugdan ang maong kalihukan pinaagi sa usa ka santos nga misa og gisunod ang pagbukas og pagdawat sa mga bisita og participating schools pinaagi ni Mrs. Angelica T. Lanoy sa MDC.

Adunay mga nagkalain laing dula sama sa shotput, chess, lawn tennis, table tennis, volleyball, basketball og badminton.

Nigawas nga kam-peyon ang host school nga mao ang MDC-Tubigon pinaagi sa pagdaug sa basketball nga naulahi ang championship.

Kahinumduman nga gipahigayon sa samang tung-haan ang unang kalihukan og sunod ang CVSCAFT-Clarin dayon CVSCAFT-Calape og balik sa MDC ning tuiga.

Rani Nath Library gitukod alang sa Brgy. Pinayagan Norte
Ni: Jingle L. Tripoli
Agosto 24, 2008

TUBIGON - Gitukod ang usa ka library alang sa katawhan sa Brgy. Pinayagan Norte uban sa paningkamot ni Kapitana Inday Loresto.

Gihimo ang ground breaking sa maong library niadtong buwan sa Mayo nga tinambongan ni Madam Pureza Chatto, Mayor Luna C. Piezas, mga opisyales sa lungsod sa Tubigon ug mga konsehal sa maong barangay.

Tuyo ug tumong sa maong library nga magamit sa katawhan ilabina sa mga kabataan nga nagtungha.

Mogahin og pipila ka oras matag semana ang mga tinun-an sa elementarya sa maong barangay alang sa pagbisita sa maong library.

Natukod ang maong library nga gipaluyohan og gipundohan ni Dr. Manoj ug Ana Nath. PR

ESWM information drive gipahigayon
Ni: Jingle L. Tripoli
Agosto 24, 2008

TUBIGON - Gipahigayon ang usa ka information drive mahitungod sa Ecological Solid Waste Management (ESWM) matag barangay ning lungsod.

Ang katuyoan mao nga aron ang mga lungsoranon makahibalo sa balaod mahitungod sa ESWM.

Gihangyo ang matag barangay sa pagbahin-bahin sa ilang mga basura aron malain ang mga dili-malata ug malata.

Ang garbage truck sa maong lungsod mokuha sa mga basura matag barangay kada semana og dunay nakapaskil niini nga “No segregation, No collection” nga sa ato pa dili mokuha ang mga basurero kun wala kini bahin-bahina.

Gisugdan ang maong kalihukan sa kaislahan nga barangay og sunod ang coastal barangay og mainland.

Bag-ong water meter, ipuli sa daan og tayaon
Ni: Jingle L. Tripoli
Agosto 24, 2008

TUBIGON - Adunay bag-ong water meter nga gipang-apod-apod ang lokal nga pangagamhanan sa Tubigon ngadto sa mga konsumidor nga guba ug tayaon ang mga water meter.

Lakang kini nga gihimo sa pangagamhanan alang niadtong mga konsumidor nga dunay yangongo mahitungod sa ilang meter ilabina kadtong nangaguba na.

Matod ni Boy Delgado, usa sa mga nakapahimulos sa maong programa nga dako niyang pasalamat ug kalipay nga mailisan ang iyang guba ug tayaon nga water meter kay nahadlok siya og basin mao kini hinungdan nga makontaminado ang tubig.

Ang maong water meter makuha sa buhatan sa tresurera sa lungsod nga nagkantidad og usa ka libo ug pagabayran sulod sa lima ka bulan nga balor og dos syentos pesos nga ipuno sa ilang water bill matag bulan.

Mga chief tanod sa barangay, niagi og pagbansay-bansay
Ni: Jingle L. Tripoli
Agosto 24, 2008

TUBIGON - Gipahigayon ang pagbansay-bansay sa mga chief tanod sa lungsod sa Tubigon niadtong adlawng Biyernes Agosto 8, 2008 didto sa munisipyo sa maong lungsod.

Gipasabot ni MLGOO Ma. Sharon Marimon ngadto sa mga barangay chief tanod ang importansiya mahitungod sa Barangay Peace and Order Committee (BPOC) sa ilang barangay.

Dugang sa maong kalihukan, nitambong og nihatag sa ilang pagbansay-bansay ang mga opisyales gikan sa Philippine National Police – Tubigon, Bureau of Fire Department og Municipal Agriculture Office. Mapasalamaton ang mga chief tanod nga niatender tungod kay daghan ang ilang napupo og nakat-onan gikan sa maong kalihukan. PR

09183412164

Pinakabagong Salawikain ng PILIPINO
*An apple a day... makes efren bata reyes and ronnie alcano cry everyday. (they have NO TEETH)
*Aanhin pa ang damo, kung patay na si diego.
*Kapag maiksi ang kumot.. mura lang.
*Papunta ka pa lang... sige ingat!
*Ang taong naglalakad nang mabagal, tumatakas
*Kapag may usok, may mamamatay na lamok.
*Walang matiyagang lalake.. na manligaw sa mukhang binabae.
*Kung walang magpapaloko... hindi tatakbo si gloria arroyo.
*Ang taong mainggitin, panget.
*Behind the clouds, are airplanes.
*Ang sakit ng kalingkingan, dapat ipatingin sa doktor.
*Pag may usok... baka nasa langit kana!

READ ALL

READ ALL

Gud mwneng JBBN, im Angeline Bautista frm Clape, I just wanna hve a txtmte boy 18 above, bhalag d kau gwpo bsta respnsible dn ny work. Tnx JBBN nd more power 2 ol d staff. 09197142032

Hi gud am JBBN. Puyde ko makigtxtmate. 09192719329

READ ALL

09183412164

Ei. JBBN. Wntd txm8 lng. Im Smantha Shane. Knang mhtg og load. Jeje. Smart user lng. Cutieshane16@yahoo.com. 09072777773. (Posted: December 21, 2008)

Good day! 2 everyone. I would to extend my gratitude to all staff of JBBN for making me pleasure while reading their column. I am much inform about the event today including latest issue as well as in showbuiz. For me you’re the best among the rest. Keep it up! Add me up mga friends. Thank u so much. Elvirgen_ Cantiveros @yahoo.com
(Posted: November 30, 2008)

A pleasant mrning 2 ol d staff of JBBN. I’m Leah of Bohol, luking 4 a guy txtm8 16yrs & above ung my sense of humor, and add u din po aq sa FS q Lovelyrecca@yahoo.com. Tnx & more power. (Posted: November 23, 2008)

Hi! JBBN. Gr8 lng q xa aqng mga frndz xa UB-Loon, especially 2 d 3rd yr Amethyst! Guys, good job. Nya add xd q nnu. Cutiezai_MheL93@ yahoo.com. (Posted: November 16, 2008)

STAFF BOX

Ritsutaka "Papa Jappil" Masuda - Owner
Delia Masuda - Publisher
Rey Dalay - Editor-in-Chief
Edward Guyano - Chief Reporter
Helios Pusta - Layout Artist/Writer
Dennis Medilo - Layout ArtistWeb Designer Jeffrey Bellita - Printing-Press Operator

CORRESPONDENTS
Boy Luzon - Loon
Lando Aparece - Sierra-Bullones
Y-Not Deloso - Anda
Admi Valmores - Talibon
Jingle Tripoli - Tubigon

CONTRIBUTORS
Rey Anthony Chiu - PIA
Gregorio Tavera - Jagna LGU
Fiel Angelie Gabin - Tagbilaran City LGU
Nestor Daarol
Bruce Zabala - PGMA

COLUMNISTS
Rey Dalay - Editorial
Edward Guyano - Kay Ngano Kaha? (K na K)
Rey Anthony Chiu - Kon Ako'y Pangutan-on
Lando Aparece - Komentaryo
Jingle Tripoli - Lihok Kabataan
Priscilla Richards - East Meets West
Y-Not Deloso - Nganong Dili?
Tor Telin - In My Opinion
Rammel Cagulada - Coop Pesos
Admi Valmores - Igo Na
Carmen Caga - Yayay!

MARKETING / ADVERTISING
Y-Not Deloso
Edward Guyano
Roger Sarausa
Frank Iyog
Nestor Daarol