Block tienda gilungkab, groceries gihakot
Hunyo 22, 2008

Garcia-Hernandez – Usa ka market collector ang mitaho sa kapolisan kaniadtong Lunes (Hunyo 16) nga duha ka mga block tenda sa merkado publiko sa Poblacion, ang nalungkab ug nakawatan sa mga grocery items.

Mirespondi ang mga kapolisan sa taho ni Roberto Ranario ug misusi kini sa mga nabiktimang tindahan.

Ang mga establisamento mao ang J&3 Mary’s, ug ang San Juan Multi-Purpose Cooperative.
Matud pa sa mga pulis, ang paglungkab nahitabo sayo sa kadlawon.

Nakit-an usab nga ang padlock naguba.

Mga nagkalainlaing mga grocery items ang mga nahanaw, sama sa mga lata sa sardines, beef loaf, corned beef, green peas, mga pakete sa kape, milo, bear brand, skyflakes, ug mga battery.

Ang balor sa mga nahanaw mikabat og P2,500 kapin. Ang mga polis naghimo pa og dugang imbestigasyon. DM