Unom ka mga bukirang barangay sa lungsod sa Dimiao ang
makapahimulos sa nindot ug kongkretong kalsada ug gilauman nga mapaugmad na unya
ang pagpanguma sa maong dapit.
Sa Milabay nga Martes Hunyo 17 gihimo ang serimonyas
pag-turnover sa mokabat ngadto sa 17 milyones nga proyekto ubos sa pagpasiugda
sa Department of Agrarian Reform isip kabahin sa ilang Agrarian Reform
Communities Development Project.
Ang DAR nga girepresentahan nila ni Dir. Tony Del Socorro gikan
sa rehiyonal nga buhatan ug Atty. Johnson Sinco, PARO II, Provincial Project
Director mao ang mi-turnover ngadto sa probinsya sa Bohol nga girepresentahan ni
Acting Governor Julius Caesar F. Herrera, Cong. Adam Relson Jala nga
girepresentahan ni kanhi Kongresista Boy Jala, Mayor Sylvia Adame sa lungsod sa
Dimiao ug sa mga kapitan sa mga barangay sa Oac, Baguhan, Pag-asa, Balbalan,
Guindaguitan ug Pangihawan nga sila si Kapitan Raymundo Malata, Ernesto Bigcas,
Zacarias Adeser, Jr., Antonio Galleto, Sr., Marina Acol-acol ug Marcelino
Lagunda.
Mokabat ngadto sa 12 ka mga kilometro ang barangay road nga
nagtadlas sa maong mga barangay ang nakongkreto nga adunay gilapdon nga tulo
ngadto sa 4 ka metros uban sa lapad nga shouldering niini.
Dako kaayo ang pagpasalamat ni Mayor Sylvia Adame ngadto sa
Department of Agrarian Reform nga giaprobahan ug giimplimentar ang maong
proyekto alang sa mga kabarangayan sa iyang lungsod sa Dimiao.
Si Adame halos walay pahuway sa pag-follow-up sa maong proyekto
aron lang mahatagan og kasayon ang mga taga barangay sa ilang agianan.
Sa iyang bahin si Acting Governor Julius Herrera mipahalipay sa
mga nagdumala sa lungsod nga gipangulohan sa mayor ug ngadto sa mga kabarangayan
nga makabenipisyo sa usa ka nindot nga proyekto.
Gilauman ni Herrera nga mouswag na unya ang klima sa pagpananom
sa maong mga dapit ug madugangan ang kasibot sa mga mag-uuma sa pagpananom sa
mga nagkadaiyang lagutmon, utanon ug mga kahoy sama sa prutas ug uban pa.
Sumala pa ni Herrera nga dili unta gamiton ang kalsada sa mga
molupyo sa maong dapit aron sa sayon nga pagtugbong ngadto sa merkado alang sa
pagpalit og mga utanon ug lagutmon kon dili gamiton ang maong kalsada alang sa
pagtumod sa ilang mga abot sa uma.
Gidugang pa ni Herrera nga kon kini maoy mahitabo makatabang ang
katawhan sa lungsod sa Dimiao sa food security program sa kagamhanan.
Si Herrera padayon nga nanawagan sa pagpananom gayod aron dili
malakip ang nasod ngadto sa mga nasod karon nga naprolema sa pagkaon.
Samtang ang Department of Agrarian Reform pinaagi ni Dir. Tony
Del Socorro miawhag usab sa mga binipisyaryo sa maong proyekto nga ila untang
ampingan kini isip kabahin sa pagpaugmad sa ilang panginabuhian sa maong dapit,
“Dili unta ta mag-ningas kogon nga amaayo lang ta og bag-o pa,” pamahayag pa
niini atol sa gihimong turn-over ceremony.
Kon dili na mahatagan og lugway ang pagpanerbisyo sa DAR nga
matapos karong buwan sa Disyembre, ang proyekto sa Dimaio maoy usa sa ilang
panakadakong proyekto sa Bohol.
Gisubhan usab sa maong adlaw ang proyekto sa ARCDP didto sa
barangay Ambuan ug Liburon sa lungsod sa Catigbian ubos sa pagpangulo ni Mayor
Bert Salinas atol sa pagsaulog sa Catigbian sa ilang ika-59 nga anebersaryo sa
pagka lungsod ug Katigbawan Festival.
Mokabat ngadto sa 16 ka mga lungsod sa Bohol nga adunay mga
barangay nga benepisyaryo sa ARCDP 2 sa Department of Agrarian Reform nga ubos
sa pagpundo sa World Bank.