BALITANG LOKAL (DAGOHOY)
Ika-52 nga pagkalungsod sa Dagohoy gisaulog
Ni: Roger Escobido
Hunyo 22, 2008
Upat ka mga adlaw ang gigahin sa mga Dagohoynon, pinangulohan sa ilang Mayor Dr.
Germinio C. Relampagos, alang sa ilang paghandum sa ika Kalim-an ug Duha (52) ka
tuig nga pagkalungsod (Foundation Day) gikan niadtong Myerkules (Hunyo 18)
hangtud kagahapong adlawa.
Ang Dagohoy nahimong usa ka lungsod niadto pa lamang Hunyo 21, 1956 pinaagi sa
gahum sa usa ka Executive Order 184 ni kanhi Pamuno Ramon Magsaysay.
Sa buntag niadtong Myerkules, gihimo ang mga kalihokan nga may kalabotan sa
kinabuhi sa mga mag-uuma, nga mao ang libreng pagpahiling sa ilang mga binuhing
kahayopan (Free Clinic on Livestock), pagpang-injection sa ilang mga binuhing
iro ug ang pagpamurga sa ilang mga binuhing kanding.
Pagkahapon, hangtod sa tanang hapon ngadto sa adlawng Byernes, gipahigayon ang
buwang sa tanang mga manok igtatari, nga gipanghingusgan sa mga sakop sa
Sangguniang Bayan ning lungsod pinangulohan ni Besi-Mayor Ma. Shirley Amodia.
Pagkagabii sa adlawng Huwebes, mao ang unang hugna sa Inter Barangay Amateur
Boxing Tournament nga giapilan sa tanang kabatan-onang mahiligon sa dulang
boksing.
Sa pagkagabii sa adlawng Biyernes, gihimo ang Poblacion Basketball Championship
nga gipasiugdahan ug gidumala sa mga opisyales sa Barangay Poblacion.
Kagahapong adlawa, Sabado, gihimo ang libreng pagpang-examin ug pagpanambal sa
mga tawong mga masakiton (FREE CLINIC) nga gipangulohan ni Mayor Relampagos
kinsa usa usab ka mananambal.
Pagkahapon gihimo na usab ang ika duhang hugna sa Inter Barangay Amateur Boxing
Tournament diin gipili ang napulo ka kinamaayohang boksidor sa lungsod.
Pagkagabii, gilingaw ang mga Dagohoynon sa mga awit/sayaw sa inila na kaayong
Dos Compañeros sa Cebu.
Mitambong isip pinasidunggang dinapit si Besi Gobernador Julius Herrera.
SK sa Dagohoy mipaubos sa Iskolar-Bos
Ni: Roger Escobido / MPIO
Hunyo 8, 2008
Dagohoy - Mga kapin kon menos usang gatos ka mga kabatan-onang
sakop sa Sangguniang Kabataan ning lungsod naghimo sa ilang ISKOLAR-BOS diha sa
Chocolate Hills Resort Complex, sa silingang lungsod sa Carmen, Bohol niadtong
miaging Mayo 27 hangtud sa 30.
Si SK Federated President Sofronio C. Apat, Jr., anak sa kanhi
Mayor ning lungsod, maoy nag-una sa pag-atender sa Integrated Sangguniang
Kabataan Organizational Leadership and Reorientation - Basic Orientation Seminar
kon ISKOLAR-BOS uban sa mga SK opisyales sa napulo'g lima (15) ka mga barangay
ning lungsod. Ilang nakat-onan gikan sa ilang mga magtutudlo nga sila si Jose
Roel Tumarao, MLGOO sa Carmen ug Dagohoy, Jogepons Ruloma sa Sierra-Bullones,
Joseph Malabosa sa lungsod sa Pilar, ug Fidel Narisma sa Batuan, unsa
kaimportante ang SK Constitution and By Laws, ang ilang tagsatagsa ka mga gahum
ug katungdanan isip SK Tsirman, Sekretaryo o Tesorero o yano nga sakop lang, ug
ang husto nga pagplano alang sa ilang nagkadaiyang mga kalihokan.
Gibansay usab sila unsaon pagkahimo nga maayo nga "lider" ug
unsay angay nga mga buhaton pagorganisar ug mga komitiba, ug pagkuha sa
kooperasyon sa ilang mga kaubanan aron usab mahimo nila nga makadala sa renda sa
panggamhanan.
Gani gitudloan sila unsa ang relasyon sa lokal nga panggamhanan
ug sa nasyonal, ug ingon man ang kuti nga “budgeting and finance.”
Santacruzan
2008 sa Dagohoy malampuson
Ni: Roger J. Escobido
Hunyo 8, 2008
Dagohoy - Niadtong Mayo 31, atol sa pagtak-op sa mga kalihokan
sa “Flores de Mayo” sa mga Katolikong kabatan-onan ning lungsod,
gihimo ang pagkorona sa napiling “Reyna Elena Ug Prinsipe
Constantino” sa Santacruzan 2008 sa Parokya sa Mahal nga Birhen
sa Lourdes.
Sinaksihan sa bagang duot sa katawhan diha sa Dagohoy Cultural
Center, si Regel A. Escobedo nga nagrepresentar sa mga pundok
nga taga Sitio 1 sa Poblacion ning lungsod maoy nahimong Reyna
Elena, samtang si Dominique Lagapa nga nagrepresentar sa grupong
relihiyoso nga ginganlag “Ginoo Ikaw Ra” o GIRA, maoy nahimong
Prinsipe Constantino.
Ang nagkorona sa Reyna Elena ug Prinsipe Constantino 2008 mao
ang Kura Paroko sa Parokya sa Birhen sa Lourdes nga si Reberendo
Padre Jose Pompei “Jojo” Solana inabagan sa Reyna Elena 2007.
Si Regel, 17 anyos ang panuigon, maoy ikatulo nga anak sa
magtiayong Roger ug Elnora Apat Escobedo, ang Municipal Civil
Registrar sa lungsod sa Dagohoy, ug si Elnora usa sa mga
magpapatigayon sa samang lungsod.
Si Dominique, anak sa magtiayong kanhi Kagawad sa lungsod
Artemio Lagapa ug empleyado sa Buhatan sa Panalapi sa lungsod
nga si “Jiji” Busalanan Lagapa.
Ang nakakuha sa ika-duhang lugar alang sa pagkaReyna Elena mao
ra usab ang ig-agaw ni Regel nga si Anthea Cericos.
Si Anthea anak ni Engr. Reydempto Cericos ug Sangguniang Bayan
(SB) Kagawad Cristita Apat Cericos.
Sa ika-tulo nga lugar mao ang anak ni Bise-Mayor Ma. Shirley
Amodia, nga si Girlette Amodia.
Ang Santacruzan 2008 nahimong malampuson pinaagi sa mga kasibot
sa mga ofisyales sa Confraternity of Our Lady of Lourdes o
pundok sa mga Lourdesians nga gipangunahan sa ilang Presidente
nga si Elvira Justol ug sa ilang adviser nga si Gaudiosa “Mamay
Godie” Apat.
Mitabang usab ang mga ofisyales sa mga Lourdesians sa kabaryohan
ug ingon man sa pito ka mga sityo sa Poblacion.
Ang nahipos nga salapi sa maong kalihokan igugol alang sa
pagpatahum sa palibot sa nagbarog na karon nga Grotto sa Mahal
nga Birheng Maria.
|