BARANGAYS
Bilangbilangan Dako
Bilangbilangan Diot
Hingotanan East
Hingotanan West
Liberty
Malingin
Mandawa
Maomawan
Nueva Esperanza
Nueva Estrella
Pinamgo
Poblacion (Bien Unido Proper)
Puerto San Pedro
Sagasa





 
BALITANG LOKAL (BIEN-UNIDO)

Bien Unido moapil sa Sinulog Streetdancing
Ni: Adonis Damalerio, Rey Dalay
Hulyo 20, 2008

BIEN-UNIDO - Kon kaniadto naila ang lungsod nga maoy gipuy-an sa mga ilegal nga mangingisda, karon buot ipakita sa lungsod nga aduna positibo nga bahin sa ilang lungsod nga sukwahi sa gituohan sa kadaghanan.

Una kini sa kasaysayan sa lungsod sa Bien Unido nga magpadala og contingent alang sa Sinulog Street dancing.

Nakahimo na pag-apil sa unang higayon ang Bien-Unido alang sa Sinulog niadtong milabayng Enero 2008.

Bisan pa man sa kabag-o, nagpakita na sa ilang katakus ang mga contingent diin nakakuha kini sa ika unom nga puwesto.

Ning tinuig nga pagsaulog sa Sandugo karong bulana, paningkamotan na usab sa lungsod sa Bien-Unido, pinangunahan sa batan-on ug maabtik nga mayor sa lungsod, Mayor Niño Rey Boniel, ipakita na usab sa mga contingent sa lungsod ning higayona ngadto sa mga Bol-anon ang tema kabahin sa mga produkto nga gikan sa dagat.

Gawas sa ubang mga misalmot kinsa adunay ikapakitang katakus kalabot sa ilang lungsod, surpresahon sa lungsod sa Bien-Unido ang mga mosaksi kon giunsa nila pagpanlipod sa kinaiyahan labi na ang mga produkto sa dagat.


Brgy. Mandawa sa Bien-Unido nagsaulog sa ika-63 nga katukoran
Ni: Roque Macua
Hunyo 29, 2008

Bien-Unido - Usa ka mauswagong Barangay sa Bien Unido ang Barangay Mandawa ang misaulog sa ilang ika-63 nga foundation day niadtong Byernes Hunyo 20 tinambongan sa mga lokal nga mga opisyal sanglit usa ka mabibong andam ang gidalit sa ilang adlawng kasumaran.

Nagkadaiyang mga kalihokan ang giandam apil na niini ang paghatag og recognition sa mga molupyo nga mihatag og kalamboan sa maong Barangay.

Usa sa mga malipayong mitambong sa maong kasaulogan ang batan-ong Mayor sa lungsod nga si Mayor Niño Rey Boniel.

Iyang gikalipay nga ubay-ubay na sad ang nahimong mga proyekto sa iyang paglingkod sa usa na ka tuig sa pagserbisyo sa maong lungsod.

Daghang mga kalingawan ang giandam hangtod na sa pagka gabii apil na niini ang mga nindot nga cultural show ug modern dance competition, wa pay labot ang mga paugnat sa kusog nga giandam sa mga opisyal sa barangay pinangulohan ni Punong Barangay Rosemarie Boniel.


Pagpasira sa buwangan dili pamolitika
Ni: Rey Dalay
Hunyo 22, 2008

Kaayohan sa katawhan ang gilantaw ni Bien Unido Mayor Niño Rey F. Boniel ug dili pamolitika ang hinungdan sa pagmando niini nga pasirad-an ang buwangan nga anaa mahimutang duol sa mga pampublikong establisamento sa lungsod, ug ibalhin sa laing dapit.

Ang lakang sa mayor pinasikad sa resolusyon nga gipasar sa Sangguniang Bayan ug ingon man sa resolusyon nga gipalabang ug pinirmahan sa tanang mga Barangay Kapitan tungod kay nakita nga adunay kalapasan nganahimo ang maong buwangan.

Si Boniel mihimo dayon og fact finding committee aron pagsusi kon unsa ang kahimtang sa maong buwangan. Ang maong fact finding committee gilangkoban sa MPDC, Municipal Engineer, ug ang tsirman sa Committee on Ways and Means sa Sangguniang Bayan.

Basi sa pakisusi sa maong komitiba, nasuta nga wala kini sanitation, parkingan, ug dili na kini presentable tungod kay gubaon na kini.

Gawas niini, ang maong buwangan nakalapas usab sa mga lagda sa ordinansa sa lungsod tungod kay nasulod kini sa 800m nga gidili nga gilay-on gikan sa mga pampublikong establisamento.

Ang maong buwangan kasamtangang nahimutang nga duol sa buhatan sa kapolisan, sa gymnasium diin anaa ang buhatan sa Bise Mayor, ug sa balay lungsod.

Ang operator sa maong buwangan, misupak sa gihimong lakang sa Mayor ug mipasaka kini og sumbong nga Grave Abuse of Authority ngadto sa Ombudsman batok sa Mayor ug mga sakop sa Sangguniang Bayan.

Gihimong basehan sa operator sa buwangan nga mas nauna pa ang buwangan kaysa mga public building ug gawas pa niini aduna usab silay gihoptan nga prangkisa sa gamefowl.

“Dili ba diay ta gusto nga moasenso ang lungsod tungod sa buwangan?” pamahayag ni Mayor Niño Boniel.

Samtang gihimo usab nga pananglitan ni Bise Mayor Petronilo R. Justiniane ang nahitabo sa mga buwangan sa lungsod sa Trinidad ug Ubay nga kanhi nahimutang duol sa mga pampublikong establisamento apan gipabalhin ngadto sa layo nga lugar.

“Nganong nabuhat man sa ubang lungsod unya sa Bien Unido dili na hinuon?” pamahayag sa Bise-Mayor.

Gitataw ni Mayor Boniel nga ang iyang aksyon pinasikad sa mga lagda sa local government code.


Mananagat sa B-Unido dakpon kay walay permit
Ni: Rey Dalay
February 24, 2008

Dakpon ang mga mananagat nga gikan sa Bien-Unido sa panahon nga sila managat bisan pa sa kadagatan sa lungsod tungod kay walay permit.

Kini maoy gipaabot nga reklamo ni ABC President Regalado Bunado ngadto sa mga sakop sa Sangguniang Bayan sa lungsod sa Bien Unido atol sa sesyon niini niadtong Lunes.

Unod sa reklamo ni Bunado mao, nga ang kapolisan sa lungsod sa Talibon ug Pitogo mosulod sa jurisdiction sa kadagatan sa lungsod sa Bien-Unido unya manakop sa mga mananagat diin ilang guyoron ngadto sa ilang lungsod unya pamultahon kay nanagat sa ilang jurisdiction nga walay permit.

Si Kagawad Dodong Villarias nagbutyag nga walay mahimo ang Sangguniang Bayan sa maong problema tungod kay ubos kini sa jurisdiction sa CLEC.

Dugang gibutyag ni Villarias nga nagdugang ang suliran nga giatubang sa mga mananagat, kay kon gusto nilang mokuha og permit dili kini hatagan tungod kay dili sila residente sa nasangpit nga mga lungsod nga mihimo sa pagpanakop.


3 ka mananagat gipusil sa militar
Ni: Rey Dalay
February 17, 2008

Mikawas na sa ilang gisakyan nga pumpboat ang tulo ka mga mananagat sa dihang gipusil kini sa mga sakop sa militar ug nakaangol sa duha niini niadtong milabayng semana didto sa islang barangay sa Malingin, Bien-Unido.

Naigo sa paa si Robisito Gudiz, 29 ang pangidaron, ug naigo sa abaga si Richard Laride, 30 ang pangidaron.

Ang mga biktima nanagat gamit ang liba-liba didto dapit sa lungsod sa Pitogo, diin didto ang mga militar nga maoy gitahasan pagbantay sa underground cable sa kuryente.

Gilutos ang mga mananagat sa mga sakop sa militar hangtod sa isla sa Malingin, dili na sakop sa jurisdiction sa Pitogo.

Ang kapitan sa Malingin ug mga opisyal sa barangay didto na sa baybayon nagpaabot kay nakakuha sila og kasayuran nga adunay taga Malingin nga gigukod sa militar.

Ang tulo ka mga mananagat mikawas na sa ilang gisakyan nga pumpboat ug didto na sa baybayon, apan gipusil gihapon sa mga militar nga nagukod kanila atubangan sa mga mata sa katawhan ug mga opisyales sa barangay.

Sigun sa pamahayag ni Kag. Rogelio Villarias sa lungsod sa Bien-Unido, ang mga mangingisda sa Malingin maoy nalahi sa tanang mananagat kay sila pamusilon man, samtang ang ubang mananagat dakpon lamang.

Basta masulod sa jurisdiction sa Pitogo nganong pusilon man, samtang kon sa Talibon dili man pusilon, dakpon lamang ang mananagat?

Unsay kalainan sa manglulugos o kriminal nga dakpon man sila dili man patyon, nganong ang taga Bien-Unido pusilon?" dugang pamahayag ni Kag. Villarias.

Mihimo na og pakisusi si Villarias sa buhatan 302nd Brigade nga nagbase sa lungsod sa Carmen diin naghimo na og pakisusi ang buhatan ni Col. Yano, apan wala pay resulta.

Ang naghatag og dugang kalibog niini, tungod kay wala man mahibawo si Mayor Niño Boniel, chairman sa Coastal Law Enforcement Council (CLEC II) sa gihimong lakang sa lungsod sa Pitogo.

Ang CLEC II naglangkob sa Buenavista, Getafe, Talibon, Bien-Unido, Ubay ug Carlos P. Garcia (Pitogo).

Dugang gipasupot ni Villarias, nga dili kini maoy unang panahon nga adunay nahitabong pagpamusil sa mga mananagat gikan sa Malingin, hangtod karon, adunay mga samaran, namatay, apan walay aksyon si Col. Yano ug ang mayor sa Pitogo.

Ang islang barangay sa Malingin pagpangisda maoy nag-unang panginabuhian. Dili sama sa Hingotanan nga sakop gihapon sa Bien-Unido diin ang katawhan adunay pangita nga guso, sa Malingin misulay ang katawhan pag-ugmad sa guso apan wala kini magsilbi tungod kay dili susama sa Hingotanan ang ilang dagat.


Bien Unido midaug sa Sinulog sa Sugbo
Ni: Art Bagcat
February 3, 2008

Ang lungsod sa Bien Unido nga maoy bugtong mananalmot nga nagagikan sa lalawigan sa Bohol nahimong mananaog og ilang nalangkat ang ika unom nga pwesto isip usa sa labing maayo nga panon nga mipasundayag sa sinulog didto sa dakbayan sa Sugbo atol sa gipahigayon nga kasaulogan sa pista senyor.

Ilang naangkon ang bugti nga salapi nga mokabat ngadto sa 100,000.00. Sa 51 nga sumasalmot sa maong panagsangka, ang entrante sa lungsod sa Bien Unido mipakita sa ilang katakos pinaagi sa maayo nga pagpasundayag nga maoy nakapa-agni sa mga hurado aron hatagan sa puntos og mahiapil sulod sa magic ten isip usa sa pinaka maayo nga panon.

Si Mayor En-en Boniel, mapasalamaton ngadto sa mga hingtungdan nga dayag misuporta sa ilang pagsalmot, labi na ang lalawigan sa Bohol nga gipangulohan ni Gobernador Erico Aumentado, Bise Gobernador Julius Herrera, mga sakop sa Sangguniang Panlalawigan ug sa tanang lokal nga kagamhanan sa kalungsoran nga miabag sa paghatag og suporta labi sa mga galastohan niini, sa tanang sakop sa Sangguniang Bayan sa lungsod gipangulohan ni Bise Mayor Petronilo Justiniane, mga kagawad: Hon. Froilan Romo, Hon. Patricio Avenido, Hon. Rogelio Villarias, Hon. Mansueto Garcia, Hon. Alejo Boniel, Hon. Sotero Macua, Jr., Hon. Regalado Bunado ABC president, Hon. John Michael Boniel Sk President, Hon. Eduardo Gentapa, mapasalamaton kini ngadto sa tanang nga departamento sa ilang lungsod tungod sa ilang way puas nga suporta, ingon man usab ngadto sa ilang Choreographer nga si Mr. Charlie Itable nga maoy mibansay sa mga bata aron mamahimong hanas.

Ila usab nga gipasalamatan ang ubang mga patigayon sama sa Jollibee, Sun Cellular. Matod pa usab ni Bise Mayor Justiniane nga, garbo usab sa ilang panon tungod kay naghatag kini og dakong garbo sa lalawigan sa Bohol.